DESISHON DI HUES DEN KASO DI HÓBEN INDOKUMENTÁ

DESISHON DI HUES DEN KASO DI HÓBEN INDOKUMENTÁ
Korte a dikta sentensia, djamars atardi último den un kaso kaminda un hóben menor di edat (16) indokumentá prosedente di Venezuela, pa medio di su abogado a hiba Gobièrnu Korte eksihiendo pa suspendé su detenshon na Sentro di Detenshon i Korekshon Kòrsou (SDKK) i tambe su ekspulshon for di Kòrsou. El a basa su petishon – pa no ekspuls’é for di pais i mand’é bèk Venezuela – riba artíkulo 3 EVRM (Tratado Europeo pa Derechonan Humano). E maneho di Gobièrnu ku ta keda apliká ora ku un persona
hasi apelashon riba artíkulo 3 EVRM, ta stipulá ku na momentu ku un persona hasi un apelashon riba e artíkulo aki, outomátikamente lo no deport’é tanten ku no tin un desishon riba e petishon ku el a hasi.
Pa e motibu aki Korte a rechasá petishon di e hóben enkuestion i a konsiderá ku su petishon na Korte no tabata nesesario ni urgente, mirando ku ya Gobièrnu tin esaki proseduralmente bon deliniá.
Korte a konsiderá e maneho di Gobièrnu pa ku detenshon di personanan ku drenta di forma ilegal i indokumentá na nos isla, algu korekto ku ta kuadra ku nos leinan lokal. Sinembargo, teniendo kuenta ku e hóben aki ta menor di edat, Korte a instruí Gobièrnu pa no manten’é den detenshon, pero sigui dun’e e kuido nesesario manera tabata hasiendo kaba durante su periodo di detenshon pero den un otro instituto. Den e kaso spesífiko aki hues a rekomendá, pa entrante 7 di mei próksimo ubiká e hóben aki den
JJIC (Justitiële Jeugdinrichting Curaçao – ántes GOG). Ku e desishon aki Korte ta duna muestra di komprenshon pa e situashon ku Kòrsou ta konfrontá i ku su sentensia e ta duna espasio na Gobièrnu pa regla un otro lugá di estadia pa e hóben en kuestion kende tabata permanesiendo den SDKK huntu ku algun adulto ku ken e la drenta nos pais di forma ilegal.

Maneho

Korte a konsehá Gobièrnu pa desaroyá un maneho por eskrito en kuantu menornan di edat indokumentá ku drenta nos pais via di rutanan ilegal sin kompañamentu di un mayor. E fenómeno aki ta unu resien ku bèrdat Gobièrnu ta trahando riba dje kaba i e lo bai sigui e konseho di Korte pa ku esaki. Mirando ku djárason tabata un dia liber, awe djaweps vários instansia di Ministerio di Hustisia a sinta huntu pa plania
ehekushon di e desishon aki di Korte.
E kaso aki ta unu di e 33 kasonan ku djamars 23 di aprel último a wòrdu entamá dor di Venezolanonan indokumentá ku a drenta Kòrsou di un forma ilegal. Den e kasonan aki tambe e personanan en kuestion a hasi un petishon na Korte pa suspendé nan detenshon i ekspulshon for di Kòrsou. Ainda Gobièrnu di Kòrsou ta pendiente di un desishon di Korte riba e otro kasonan.

gobiernu

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: