Discurso Premier Evelyn Wever-Croes Ceremonia “Dodenherdenking 2019”

Discurso Premier Evelyn Wever-Croes Ceremonia “Dodenherdenking 2019”

Ariba e fecha di 4 di mei tur anja den Reino Hulandes ta conmemora esnan cu a fayese durante e di dos guera mundial. Tur militarnan y ciudadanonan cu desde inicio di segunda guera mundial a fayese.
Tambe tur cu ta den guera of operacionan pa pas actualmente.
Awendia nos ta menciona cu hopi facilidad e palabra DEMOCRACIA y su principionan. Nos por biba den un país democrático, na unda paz y libertad ta reina. Nos por hasi nos escohencianan liber di cualquier presion y disfruta di tur e principionan y libertadnan cu democracia ta trese cu ne. Ta netamente pa e motibonan aki nos mester keda recorda tur esnan cu a hasi sacrificionan grandi pa awe nos por ta liber. Tur e personanan cu a perde nan bida y tur esnan cu awe ta den guera pa re establece e libertadnan democrático y e principionan di e derechonan fundamental di e ser humano.
Nos mester keda recorda cu danki na nan contribucion, na na valentia y na nan sacrificio awe nos por scohe den libertad y hasi bon uso di e libertadnan democratico.
Awe tambe nos por evalua situacionan na momento cu poder ta den un solo man. Den situacionan di un poder totalitario, ora e checks and balances di un país ta bai perdi, pa por controla y mehora situacionan den comunidad. Y entre otro esaki ta e motibo cu nos mester garantisa nos democracia y keda insisti pa no perde e libertadnan aki, y principalmente trata na pasa esaki na nos futuro generacionan.
Ta e motibonan aki, awe nos ta hunto pa conmemora tur e muher y hombernan balente cua bira victimanan pa salvaguardia nos libertad, pa nos conmemora tur otro victima y esnan cu awe ainda ta bringa pa democracia.
Perde bo bida pa nos libertad pa hopi di nos ta incomprendibel y hopi a perde nan bida pa e libertad sin cu nan mes por a mira o disfruta di dje. Pesey nos ta sumamente agadecido cu nos si awe por disfruta di nos democracia.
Pregunta ta Kiko nos mes ta bai hasi na momento cu NOS ser acerca y ta para dilanti situacionan ora otronan nan libertad ta na peliger. Na momentonan ora nos dignidad y democracia ser menasa. Na cua medionan nos lo recuri? Nos tur lo ta dispuesto pa defende nos mes den un caso asina? .
Nos ta tene dos minuut di silencio pa paz y contra guera y recorda tur esnan cu ta victima y a precidi nos den e lucha aki pa libertad y tur nan sacrificionan. No solamente pa e victimanan, pero tambe pa e sobrevivientenan y nan famia cu a keda atrás, e fecha di awe pa conmemora tur e heroenan aki cu nos hamas por lubida.
Historia a sinja nos cu na momentonan difícil asina, cu poco medio disponible, nos fe den Dios ta duna nos e forza y consuelo necesario pa sali y defende nos mes pa salvaguardia democracia y paz, cu hopi a lucha pe y sin embargo nunca por a bibe.
Ban keda recorda y conmemora nos hendenan cu dia tras dia ta lucha pa e libertadnan, mescos cu tur esnan cu a perde nan bida, pa recobra e derechonan fundamental di pueblo,
BIBA NOS LIBERTAD Y PAZ.