Nos tur huntu, pa un mas mihó kontribushon kolektivo di belasting na bienestar i progreso di Pais Kòrsou!

Nos tur huntu, pa un mas mihó kontribushon kolektivo di belasting na bienestar i progreso di Pais Kòrsou!

Den e reunion di Parlamento di Kòrsou di dia 30 aprel 2019, parlamentario Curtley Obispo a mustra ku tin un vishon nobo pa strukturalmente resolvé retonan pa asina yega na un finansa públiko sostenibel pa Pais Kòrsou. Un vishon nobo basa riba 3 trayektonan i tambe e strategia di kresementu di Pais Kòrsou. Un vishon nobo pa atendé i solushoná strukturalmente retonan di añanan ku finansa públiko di Pais Kòrsou ta wòrdu konfrontá ku n’e. Vishon kual ta basa riba: (1) e  palabrashonnan di dia 17 òktober 2018 entre Gobièrnu di Kòrsou i Kolegio di Supervishon Finansiero di Kòrsou i Sint Maarten, (2) e 5 rekomendashonnan huntu ku nan respektivo puntonan di akshon konkreto i balioso for di e rapòrt di e Komishon 2018 di Evaluashon di e Lei di Reino di Supervishon Finansiero Kòrsou/Sint Maarten. Rapòrt ku ta karga e titulo: ““Steunend op eigen kracht, maar met de wil elkander bij te staan”, (3) e kombenio di koperashon firma riba 21 yanüari 2019 entre Pais Kòrsou i Pais Hulanda i (4) e strategia di kresementu di Pais Kòrsou.

Parlamentario Curtley Obispo a mustra tambe riba un punto masha importante banda di e vishon nobo ariba menshoná. E la bolbe indiká ku un mihó kontribushon kolektivo di belasting di kada kontribuyente di belasting, ta nesesario segun nos leinan di Pais Kòrsou, pa asina sigurá ku no tin défisitnan di e presupuesto di kuenta koriente “(gewone dienst) den aña 2019 i añanan despues. Pues pa evitá défisitnan den futuro pa ku e presupuesto di e kuenta koriente di Pais Kòrsou, kada kontribuyente di belasting tin e promé deber i responsabilidat di deklará belastingnan/paga nan belastingnan kompleto, korekto i na tempu. Tambe e aparato fiskal (inspekshon i kobransa) tin e deber i responsabilidat pa sòru pa prosesonan i sistemanan di belasting efektivo/efisiente, kaminda tur kontribuyentenan di belasting ta deklará nan belasting/paga nan belasting kompleto, korekto i na tempu. Pa asina huntu garantisá entradanan struktural di belasting pa kaha di Pais Kòrsou i konsekuentemente huntu garantisá gastunan kolektivo di Pais Kòrsou. Ta nos tur huntu tin e deber i responsabilidat di garantisá un mihó kontribushon kolektivo di belasting i konsekuentemente gastunan kolektivo, ku e meta pa sigui traha na bienestar i progreso di Kòrsou!.