Stephen Walroud “Petishon pa reunion di komishon sentral ku e tópiko: Kon leu Korsou ta den e proseso pa pasa e ‘audit’ di ICAO i yega bèk tambe den kategoria 1 di FAA”
Presidente di Parlamento di Kòrsou,
Señor William Millerson,
Wilhelminaplein # 4,
Alhier.
Djaluna, 6 di mei 2019
Tópiko: Kon leu Korsou ta den e proseso pa pasa e ‘audit’ di ICAO i yega bèk tambe den kategoria 1 di FAA
Apresiable sr. Millerson,
E tarea di Curacao Civil Aviation Authority (CCAA) komo parti di e ministerio di VVRP ta pa promové i garantisá un sektor di aviashon ku ta seif, konfiabel i duradero. Den e kuadro aki CCAA ta kontrolá e sektor di aviashon di Kòrsou i tambe ta kontrolá tur kompanianan internashonal di aviashon ku ta bula riba nos isla.
Un di e tareanan prinsipal di e minister di VVRP aktual ta pa logra ku Kòrsou su aviashon ta riba nivel internashonal i tambe yega bek na kategoria 1 di Federal Aviation Administration (FAA). Pa logra esaki mester kaba e proseso denter di e ministerio pa reforsá CCAA te na e nivel ku esaki por kumpli ku e normanan stipulá pa International Civil Aviation (ICAO) di un banda i di otro banda kumpli ku normanan stipulá pa FAA. Den e kuadro aki tin un ‘audit’ di ICAO importantísimo ku ta bai tuma lugá na sèptèmber 2019. Kòrsou mester pasa e ‘audit’ aki ku éksito pa asina drenta den e hanchi pa Kòrsou su aviashon haña e status di kategoria 1 bèk. Ta for di 2012 nos aviashon a kai den kategoria 2 di FAA. Algu ku pa hopi aña kaba ta wanta desaroyo di Korsou su aviashon den tur sentido.
Teniendo kuenta ku e ‘audit’ di ICAO na sèptèmber 2019, frakshon di PAR, hasiendo uso di artíkulo 33 di nos reglamentu di órden, ta tuma e inisiativa pa hasi un petishon pa un reunion di komishon sentral ku e punto di agènda:
“Kon leu Korsou ta den e proseso pa pasa e ‘audit’ di ICAO i yega bek tambe den kategoria 1 di FAA”
Mirando e punto di agènda frakshon di PAR den e reunion aki ta pidi presensia di e minister di VVRP, Sra. Zita Jesus Leito. Tambe frakshon di PAR lo ke pa e reunion aki tuma lugá mas pronto teniendo kuenta ku e luna ku di e ‘audit’ ariba menshoná lo bai tuma lugá.
Atentamente,
Stephen Walroud Curtley Obispo Ana Maria Pauletta