Frakshon PAR: ‘introdukshon di 1% riba depósito di sèn efektivo i e ròl di FTAC den esaki’

Na: Minister di Ekonomia

Sr. K. Gijsbertha

Bellisimaweg #17

Presente

 

Kòrsou, 13 di mei 2019

 Tópiko: ‘introdukshon di 1% riba depósito di sèn efektivo i e ròl di FTAC den esaki’

 Apresiabel minister Gijsbertha,

For di 1 di mei ku a pasa un kompania bankero, bou di e lema “ménos cash” a introdusí un komishon di kambio di 1% riba depósito di sèn efektivo. Esaki sigur a trese bastante konmoshon bou di e usuarionan di e banko i komunidat en general.

Kompanianan grandi, mikro i chikí ku ta manehá depósito den sèn efektivo ta esnan ku a sinti e efekto direkto. Den afan pa kontra arestá esaki algun di e kompania/negoshinan aki a skohe pa inkorporá e komishon di 1% den e preis pa e konsumidó i/òf ta evitá pa hasi transakshonnan den efektivo.

Esaki ta nifiká direktamente ku e konsumidó ta paga mas pa un produkto i/òf un servisio. Den sierto kaso asta ta ninga pa aseptá sèn efektivo serka e konsumidó.

Tin diferente sektor den nos komunidat ku na e momentonan aki ainda ta manehá por lo general sèn efektivo, por ehèmpel transporte públiko, komersiantenan lokal na Cha Capriles Kade i tokonan di bario. Digitalisashon ta un paso den e trayekto pa modernisashon importante i nesesario pa tur kompania. Pero mester tene kuenta ku e sektor ekonómiko su ritmo pa ku kambio. Asina aki evitá ku kompetidornan chikí den e merkado i e konsumidó ta esnan mas afektá. Den afan pa drecha un situashon, por hasi mas daño.

Den kuadro di esaki frakshon di Partido Alternativa Real tin algun pregunta:

  • FTAC komo instrumento di supervishon kontra abuso di poder ekonómiko, evitá kartel i protekshon di konsumidó a wòrdu konsultá den introdukshon di e ‘exchange commission’ aki?
  • Minister Gijsbertha por indiká si FTAC a hasi un evaluashon di e konsekuensia di subida di 1% riba depósito den efektivo i si FTAC tabatin rekomendashonnan pa ku esaki?
  • Den kuadro di protekshon di e konsumidó i e leinan ku ta salbaguardiá esaki, Minister Gijsbertha por indiká na Parlamento kua ta e status di e lei “ Bescherming consumenten”?
  • Minister Gijsbertha por indiká na Parlamento si tin otro instrumento pa kontra arestá un impakto indeseá pa e konsumidó i empresario mikro i chikí?

Atentamente,

Ana Maria Pauletta

Miembro di Parlamento Partido Alternativa Real

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: