LIGA LITO 2019 A INISIÁ DJADUMINGU 19 DI MEI 2019 10’OR DI MAINTA NA TERENO DI FFK!
LIGA LITO 2019 A INISIÁ DJADUMINGU 19 DI MEI 2019 10’OR DI MAINTA NA TERENO DI FFK!
Liga Lito, patrosiná pa MCB, ta e liga di futbòl destiná pa e muchanan di mas chikí den e famia di futbòl. E aña aki manera tur aña Liga Lito ta konsistí di kategoria U-6 ku U-8 (edat bou di 6 ku 8 aña) i kada dos siman riba djadumingu di mainta pa mèrdia e hungadónan di Liga Lito ta ehersé nan deporte preferí na tereno di FFK.
Meta di Liga Lito ta pa e muchanan kuminsa siña mas di e deporte aki pa tiki tiki nan bira un profeshonal. P’esei nan bini huntu riba djadumingu pa asina kompetí na un manera sano i alabes rekreá via di e deporte di futbòl.
E aña aki Liga Lito 2019 a inisiá djadumingu 19 di mei 10’or di mainta na tereno di FFK.
Un kantidat grandi di hungadó hopi entusiasmá, akompañá pa nan ‘coach’ i mayornan a presensiá e dia aki. Sr. Rignaal ‘Jean’ Francisca, presidente di FFK huntu ku Sr. Mirco Colina ku ta forma parti di komishon Lito a habri e dia aki ku algun palabra dirihí na tur presente pa despues a sigui ku nos himno di Kòrsou interpretá pa un hungadó di Fc Stallions. Ora e parti ofisial a terminá e partidonan a kuminsá i a kontinuá te den oranan di mèrdia.
Un i tur a gosa un bòl di e apertura di Liga Lito 2019 i ta keda en espera di Liga Lito ku ta kontinuá dia 2 di yüni próksimo pa 10’or di mainta na tereno di FFK.
Liga Lito 2019 ta konta ku partisipashon di e siguiente timnan;
- Excellence School
- Vesta
- Scherpenheuvel
- Fc Stallions
- Centro Juve
- Victory Boys
- Unites Soccer School
- New Song
- C-Stars United
- Quick’60
- Jong Holland
- Real Buena Vista
Un yamada ta bai na hinter e pueblo di Kòrsou i spesialmente e fanátikonan di futbòl pa asistí na e liga dediká nos chikitin nan. Bin presensiá e weganan aki ku ta kompletamente grátis i disfrutá di e partidonan aki ku hinter bo famia.
Lito, MCB i FFK ta warda bo!
21 mei 2019
