Frakshon di PAR: ‘adaptashon deklarashon ‘nasementu sin bida’

Na: Minister di Salubridat, Medio Ambiente i Naturalesa

Sra. S. Camelia-Römer

Fort Amsterdam #17

Presente

 

Kòrsou, 22 di mei 2019

 

 Tópiko: adaptashon deklarashon ‘nasementu sin bida’ (formulario B).

 

 Apresiabel minister Camelia-Romer,

 

Resientemente mayornan di Imani Van Wilgen-Trinidad a aserka frakshon di PAR. Lamentablemente Imani a nase sin bida riba e fecha di 15 di ougùstùs 2015. Sra. Trinidad i Sr. Van Wilgen, mayornan di Imani, tin e máksimo deseo pa por tin un deklarashon riba kual nan yu su nòmber i fam ta aparesé.

 

Den frakshon di Partido Alternativa Real ( PAR) su investigashon pa yuda mayornan di Imani,  a konstatá ku kranshi tá registrá nòmber i fam di babynan ku nase sin bida, segun artíkulo 66 di e dekreto nashonal Publikashon 2001 nr. 12. Esaki ta sosodé solamente den kasonan ku e mayornan ta deseá esaki. Pero den e mayoria kaso, ta hasi uso di e deklarashon ‘nasementu sin bida’ ku e dòkternan ta yena i riba e formulario aki, no tin e nòmber ni e fam di e baby, ku konsekuensia ku e proseso ta sigui kana sin ku e baby haña un nòmber ofishal rekonosé pa Kranshi i otro instansianan.

 

E formulario pa deklarashon di ‘nasementu sin bida’, ta basa riba e dekreto nashonal data 6 di yanüari 1959. Manera indiká e formulario aki no ta duna espasio pa yena nòmber i fam pa un baby ku nase sin bida. Esaki sigur ta un situashon indeseabel. Leinan Internashonal i tambe den Reino a keda adaptá ya pa algun aña kaba pa trese kambio den esaki. Den nos pareser esaki ta un omishon ku na momento ku a adaptá e dekreto nashonal pa registrá e nòmber i fam di un baby ku nase sin bida na Kranshi, no a adaptá mesora e formulario di deklarashon ‘nasementu sin bida’ aki tambe.

 

No solamente pa e mayornan di Imani, pero pa hopi mayor ta importante pa na momento ku traha e deklarashon  ‘nasementu sin bida’, esaki sosodé ku e nòmber i e fam di e baby. Esaki ta duna e fèdrit di e mayornan un lugá i ta inisiá e proseso di saneamentu di e trouma di pèrdida di un baby.

Den kuadro di esaki na nòmber di Imani Van Wilgen i su mayornan, i tambe di tur mayor ku tin e deseo pa registrá e nòmber i fam di nan yu riba e deklarashon ‘nasementu sin bida’, Frakshon di PAR den Parlamento di Kòrsou  kier pidi Minister Camelia-Romer pa adaptá e dekreto nashonal ‘LANDSBESLUIT HOUDENDE ALGEMENE MAATREGELEN van de 6de januari 1959 ter uitvoering van artikel 2, derde lid, van de Verordening van de 13de september 1918, houdende bepalingen betreffende de verklaringen van overlijden, af te geven door de geneeskundigen in de Nederlandse Antillen (P.B. 1919, no. 22)’ ku forsa retroaktibo, pa por inkluí nòmber i fam di e baby nan ku nase sin bida riba e formulario B. Tur mayor ku ta deseá i ta poseé un deklarashon di ‘nasementu sin bida’ òf por haña esaki serka e dòkter òf instituto médiko ku a yena e deklarashon di ‘nasimentu sin bida’ den pasado, mester por bin na remarke pa hasi e kambio i agregá e nòmber i fam di nan yu ku a nase sin bida.

Frakshon di PAR ta di opinion ku tur mayor ku a pasa dor di e trouma di pèrdida di un yu na nasementu, mester haña e oportunidat si nan ta deseá esaki, pa pone e nòmber i fam riba e deklarashon di nasementu sin bida i ku esaki ta na benefisio di e mayornan ku skohe pa esaki i nos komunidat general.

Pa fasilitá e trabou athunto Frakshon di PAR ta entregá un posibel format pa ku e deklarashon ‘nasementu sin bida’. Nos ta spera di por konta ku e sosten di Minister Camelia-Römer pa ku e adaptashon aki i ku e proseso pa ku e adaptashon di e dekreto nashonal aki lo inisiá ku su debido sentido di urgensia.

 

Atentamente,

 

 

Ana Maria Pauletta

Miembro di Parlamento Partido Alternativa Real

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: