Invitashon di UNESCO Curaçao relashoná ku Idioma Materno

Willemstad. Komishon Nashonal di UNESCO Curaçao den kuadro di Dia Internashonal di Idioma Materno  21 di febrüari ta invitá interesadonan na un atardi di informashon relashoná ku e premio di UNESCO Curaçao pa Idioma Materno Papiamentu.

Manera ta ampliamente konosí e Komishon Nashonal tur aña ta otorgá e  premio aki na institushonnan, organisashonnan, òf personanan ku a demostrá mérito sobresaliente durante e aña anterior i a logra resultado efektivo ku ta kontribuí na desaroyo di nos idioma Papiamentu papiá pa mayoria di nos pueblo.Den kuadro di e ariba meshoná  Komishon Nashonal di UNESCO Curaçao ta invitá tur suidadano di Kòrsou ku ta interesá, pa asistí na e seshon di informashon kaminda tur presente lo haña tur informashon tokante e kriterionan di partisipashon/evaluashon i  kon ta yena e formulario di inskripshon .

E atardi aki ta tuma lugá djamars 28 di mei próksimo, di 5.00 pa 6.30 di atardi na Ministerio di Enseñansa, Siensia, Kultura i Deporte , APC Building, (antes APNA) na Schouwburgweg  24-26.

Pa mas informashon relashoná ku e atardi aki por tuma kontakto  ku nos na Telefòn 434-3711 óf  434-3764.