Meteo a risibí sistema piloto pa vigilá Lima di Sargaso den nos laman

Meteo a risibí sistema piloto pa vigilá Lima di Sargaso den nos laman

Aktualmente Servisio Meteorológiko ta disponé di un sistema piloto ku por detektá lima di Sargaso den Karibe i tambe traha un pronóstiko di su ruta.

Manera ta konosí, den e último añanan tabatin diferente suseso ku un gran kantidat di lima di Sargaso a yega na nos playanan i okashoná molèster, pero tambe daño na bestia di laman i na kosta. Tambe tabatin diferente otro pais den Karibe, ku a eksperensiá impakto di lima di Sargaso durante e último añanan.

Den e kuadro aki na 2017 IOCARIBE (komishon regional pa Karibe di IOC/UNESCO) a lanta un grupo di trabou, ku e ophetivo pa studia e eventonan di lima di Sargaso, ku a bira mas frekuente i ku mayor intensidat den Laman di Karibe. Adishonalmente lo krea un sistema ku por detektá i traha un pronóstiko di e trayektoria di lima di Sargaso.

Durante di un reunion di IOCARIBE e aña aki, ku a tuma lugá na Aruba na komienso di e luna di mei, e kompania di Fransia  (SCL) a presentá un sistema piloto ku nan a diseñá. Pa detektá lima di Sargaso ta usa satélitenan polar ku ta pasa over di nos region i usando un prosedimentu pa rekonosé lima di Sargassun, ku un resolushon hopi bon. Despues di lokalisá mancha di lima di Sargaso, un modèl di koriente di laman ta wòrdu usá pa kalkulá e ruta ku e lo bai sigui. Pa evaluá e sistema aki, a pidi algun pais pa us’é i pa informá nan si e sistema por detektá tur e eventonan di lima di Sargaso.

Servisio Meteorológiko Kòrsou ta disponé di e sistema piloto aki, ku por vigilá e informashon di satélite i e proyekshonnan di lima di Sargaso. Ku e informashon aki por duna instansianan konserní, manera Ministerio di GMN i AZ, ku lima di Sargaso a wòrdu detektá serka di nos kostanan i ku dentro di algun dia (1-3 dia) por yega na nos kosta. Ku e informashon aki, lo ta posibel pa e instansianan aki sali bai riba laman i kue e lima di Sargaso. Esaki lo evitá ku e lima di Sargaso aki lo yega na kosta i hasi daño na e áreanan di nos kosta. Ta premirá ku lo sigui desaroyá e mesun sistema aki, pa vigilá derame di zeta den nos region, loke ta importante despues di e derame di zeta na 2017.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: