Maduro & Curiel’s Bank tabata tin ganashi ku transakshonnan hasí via su mashinnan di swaip
Maduro & Curiel’s Bank tabata tin ganashi ku transakshonnan hasí via su mashinnan di swaip
Durante tratamentu di e kaso Troya dia 30 di yüni ultimo, hues a skucha varios testigu, entre nan empleadonan di Maduro & Curiel’s Bank ku a duna di konosé ku e banko tabata gana 3 pa 5 porshento kada bes ku un persona swaip riba e mashinnan di e banko. Entre e testigunan tabata tin sr. M. Prince i sr. Isebia. Ambos a deklará ku e banko tabata gana maksimal 5% riba kada transakshon ku tarheta pa medio di e mashinnan di swaip di e banko. A bin sali na kla tambe kua kompanianan mas tabata swaip a kambio di dollar kèsh i ku tabata tin un departamentu ku tabata kontrolá e sistema aki di swaip for di aña 2013, ku a wanta sakamentu di dollar for di Kòrsou. Tratamentu di e kaso lo kontinuá dia 6 di ougustus próksimo i lo dura te ku dia 9 di ougustus. E rekisitorio di Ministerio Publiko lo ta amplio i lo tuma kompletu un dia pa trese esaki dilanti. Abogado mr. Martina lo no ta presente di 6 pa 9 di ougustus i lo presentá su pleidooi dia 19 di ougustus benidero.
