Nos bandera di Kòrsou ta sigui uni nos pa semper!  

Nos bandera di Kòrsou ta sigui uni nos pa semper!  

Un bon dia na tur presente i tur ku ta mira i/òf skucha e reunion sòlèm aki di Parlamento di Kòrsou na okashon di  Dia di Bandera di Kòrsou.

Awe 2 di yüli 2019, ta un dia ku huntu nos ta konmemorá 35 aña di nos bandera di Kòrsou. I tambe e hecho ku ta e di 36 biaha ku nos lo subi Bandera di Kòrsou i kanta nos Himno di Kòrsou riba Plasa Brion.

Dia di Bandera di Kòrsou, ta un dia kompleto dediká na nos símbolo di union, kual ta nos Bandera di Kòrsou. Nos bandera di Kòrsou ku ta identifiká nos komo Pais Kòrsou i tambe komo Pueblo di Kòrsou. 

Nos bandera di Kòrsou ta simbolisá: – nos shelu, – e laman ku ta rondoná nos Pais Kòrsou, – e fieldat di nos pueblo, – nos solo skèrpi i e karakter alegre di nos pueblo, –  e sinku kontinentenan di diferente gruponan di poblashon di Kòrsou, – konfiansa, speransa, espektativa, – pas i felisidat ku nos tur ta aspirá. Pues nos Bandera di Kòrsou ta kòrda nos tur dia ku nos ta un Pais bendishoná.

Awe ta un dia, ku nos ta selebrá i asina preservá e tradishon, e historia, e sentido enorme di orguyo i tambe di rèspèt pa ku nos bandera di Kòrsou. Un dia sigur pa sigui konsientisá ku kada un di nos ku duna nos kontribushon ku amor na nos Pais Kòrsou. Pa asina huntu komo Pueblo di Kòrsou, e pueblo ku semper tin fe, nos logra viktoria ku trabou na bienestar i progreso di henter nos Pais Kòrsou. 

Nos bandera di Kòrsou kada bes sigur ta riba mapa mundial ku logronan di nos Yunan di Kòrsou, ku ta trese hopi positivismo, orguyo i alegria den nos tur su kurason. 

Nos bandera di Kòrsou ta sigui inspirá nos pa ta 24/7 mihó Yunan di Kòrsou. I tambe ta sigui inspirá nos pa komo Pueblo di Kòrsou, semper ku fe, di sigui ku e lucha pa nos alkansá e máksimo potensial pa nos Pais Kòrsou. Un Pais Kòrsou mas mihó, uni i pa dilanti!   

I semper na nos patria nos tin ku demostrá onor i lealtat, meskos na nos bandera di Kòrsou, union di nos nashon. P’esei Pueblo di Kòrsou laga nos kada unu tur dia i pa semper tene nos Bandera di Kòrsou na haltu i tambe nos normanan i balornan! 

Nos bandera di Kòrsou ta sigui uni nos pa semper!  

P’esei biba nos bandera di Kòrsou. Biba nos Pais Kòrsou.

Pabien ku 35 aña Bandera di Kòrsou.

Un felis i dushi dia di Bandera di Kòrsou.

I Dios bendishoná  Kòrsou.

Curtley Obispo Vice Lider di Frakshon di PAR den Parlamento di Kòrsou

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: