Premier Evelyn Wever-Croes Den su discurso na e 2019 Global Summit of Women na Suisa: PREMIER WEVER-CROES A ELABORA RIBA E VISION ECONOMICO Y VISION DI INNOVACION DI ARUBA

Premier Evelyn Wever-Croes

 

Den su discurso na e 2019 Global Summit of Women na Suisa:

PREMIER WEVER-CROES A ELABORA RIBA E VISION ECONOMICO Y VISION DI INNOVACION DI ARUBA

 

Diahuebs 4 di juli, Premier Evelyn Wever-Croes tawata oradora na e conferencia di hende muhenan den posicionnan den liderasgo na Basel, Suisa. E Global Summit of Women pa e ultimo 29 añanan ta treciendo muhenan di influencia kendenan ta lidera den negoshi y gobernacion, hunto na Suisa pa e conferencia anual sumamente importante y interesante. 

 

Na e Global Summit of Women 2019 na Basel, e Prome Minister di Namibia, Saara Amadhila

tambe tawata un oradora invita. Dilanti un audiencia di mas di 1000 participante, Premier di Aruba a conta nan di Aruba, y e exitonan di nos pais actualmente. Tambe Premier Wever-Croes a duna un relato di e retonan di Aruba y con innovacion y integridad lo yuda nos pais sali padilanti. Premier Wever-Croes a trece dilanti e vision economico hopi ambicioso cu Aruba tin cu lo crea cuponan di trabou. Pero specialmente tambe e vision riba innovacion hopi ambicioso y e rol di hende muhe den e parti di innovacion na Aruba.

 

Un atencion especifico a wordo poni riba e rol di hende muhe den e exito di Aruba su progreso. Aruba tin hopi hende muhe exitoso den e posicion di liderasgo. E articulo cu a sali den New York Times aña pasa bou di e titulo, ‘Aruba, where women lead’, a pone hopi wowo riba Aruba. Den e articulo aki ta expone nos hende muhenan den posicionnan di liderasgo den luz internacional, incluyendo Premier Wever-Croes, Minister Xiomara Ruiz-Maduro y varios muhenan exitoso di nos pais. 

 

Tawata notabel, segun Premier Wever-Croes, cu mayoria di ensnan presente den e conferencia aki no tabata sa unda Aruba ta keda. Pero despues di e discurso elocuente di Premier di Aruba, un cantidad grandi a indica di lo kier bin Aruba, sea pa vakantie of tambe pa inverti.

Cu e reaccion aki, sigur un biaha mas nos mester sinti orguyoso cu Premier di Aruba un biaha mas ta poniendo Aruba riba tarima internacional. Aruba mas y mas su nomber ta wordo nombra internacionalmente.

 

Durante su estadia cortico na Basel, Premier Wever-Croes a gara e oportunidad pa reuni cu ex Presidente di Kosovo Atifete Jahjaga. Señora Jahjaga tabata e prome presidente femenino na Kosovo kende a wordo eligi na 2011. E ex Presidente di Kosovo y Premier di Aruba a hiba un reunion hopi ameno y interesante intercambiando experiencia y conocimento riba tereno politico y riba e participacion di hende muhe den politica. Na final ex Presidente di Kosovo a regala Premier Wever-Croes un buki interesante cu ta relata e abusonan cruel di tempo di guera na Kosovo. Na su turno, Premier di Aruba a regala Señora Jahjaga un bunita revista di Aruba.

 

Premier Wever-Croes a expresa di ta orguyoso di por hiba e vision economico y di innovacion y comparti cu esnan presente den e conferencia aki. Esaki sigur ta un paso hopi importante pa atrae inversionistanan pa nos pais y asina crea cuponan di trabou. 

 

 

 

 

 

 

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: