Oportunidat pa Pueblo Partisipá den Optimalisashon i Mantenshon Playanan Rekreativo 

Oportunidat pa Pueblo Partisipá den Optimalisashon i Mantenshon Playanan Rekreativo 

Kòrsou. Gobièrnu en general i Minister di Salú, Medio Ambiente i Naturalesa (MinSMN) en partikular, kontinuamente ta buska solushon inovativo pa e retonan ku pais a bin ta konfrontá ya pa dékada. Un di e responsabilidatnan ku ta kai bou di MinSMN ta protekshon i maneho di naturalesa i medio ambiente, bou di kual ta kai maneho i mantenshon di playanan públiko na Kòrsou. E responsabilidat ei ta haña forma den infrastruktura ku ministerio di SMN ta traha na diferente playanan rekreativo, trabounan di limpiesa i mantenshon ku ta tuma lugá diariamente dor di e servisio di Medio Ambiente i esfuersonan ku ta ser hasí pa alsa kalidat di playanan pa por brinda komunidat i bishitantenan tur e fasilidatnan nesesario pa uzo optimal rekreativo di playanan.

Sinembargo, den añanan ku ta tras di lomba nos komunidat a bin ta hasi uzo intensivo di nos playanan ku ta liber i aksesibel, pero sin e kondishonnan nesesario pa por garantisá rekreashon sostenibel. E uzo intensivo di playanan públiko ta rekerí aksesibilidat liber i adekuá, parkeo, fasilidatnan di tualèt, limpiesa kontinuo, fasilidatnan pa bbq, etc. Ya pa hopi aña e servisio di MNB di ministerio di SMN a bin ta otorgá pèrmít na esnan ku apliká pa esei, pa por uza playanan pa operá snèk, garoshi di hòtdòg i otro delisianan, hürmentu di stul, parasol, sèrbètè, kayak, zwemvin i snorkel i otro artikulonan pa finnan rekreativo. Di otro banda, e uzo intensivo di playanan ta resultando kada mas den uzonan fo’i òrdu, kaminda ta parker outo pa loko, stroba tráfiko ku büsnan di bishitante, benta di karbon kayente riba santu kousando leshon na otronan, shushedat, ladronisia di tualèt, uzo iresponsabel di seadoo kaminda públiko ta landa, etc.. 

E hecho ku un gran parti di komunidat lokal, pero tambe turistanan ku ta bishitá nos isla a bin ta hasi uzo intensivo di playanan, ta habri oportunidat pa yunan di tera kreativo mira i elaborá oportunidat pa ofresé servisio i produkto na bishitantenan. Minister di SMN ta aploudí inisiativanan, ku prinsipalmente bou di hobennan bon motivá ku espíritu emprededor, a bin ta manifestá. Diferente ta esnan ku a aserka e ministerio pa por hasi uzo di e oportunidatnan pa haña pèrmit pa krea servisio i produktonan ku ta generá empleo i entrada ku tei na nos playanan públiko. 

Den e kuadro aki ministerio di SMN (AVB i MNB) huntu ku CTB a desaroyá un plan di optimalisashon di shete playa rekreativo dor di un trayekto habrí di inskripshon (destaho públiko) pa Public Private Partnership. Tur esnan interesá i ku por kumpli ku e kondishonnan skèrpi pa partisipashon, por partisipá na e destaho i bin na remarke pa invertí den infrastruktura rekreativo na e shete playanan públiko pa despues generá empleo pa YdK, dor di e operashonnan na e playanan, manera snèk, benta di suvenir, hürmentu di ekiponan rekreativo etc. Esnan ku inskribí mester invertí tambe den fasilidatnan básiko na e playa, manera tualet, ducha, parkeo adekuá, fasilidat pa bbq na sitionan adekuá, etc.   

Esnan ku gana e destaho lo ser mará na kondishonnan apsoluto, ku ta mantenshon estrikto di e karakter públiko i uzo gratis sin limitashon di e playa (p.e. bishitantenan por tin nan mes kuminda, bebida, stul, parasol na tur okashon), empleo eksklusivamente di personanan registra komo desempleo na Kòrsou tantu durante konstrukshon di fasilidat komo operashon di fasilidatnan di restorant, snèk, benta, etc., konservashon di e bista di e playa, separashon di areanan pa landa di areanan pa seadoo i peska i fasilidatnan ku ta aksesibel for di 7’or di mainta te ora solo baha. Mas aleu tin un kantidat di eksigenshanan funshonal, tékniko, pa protekshon di medio ambiente i naturalera i estétiko pa e proposishonnan di esnan ku inskribí. 

Esaki ta e promé biaha ku ta duna oportunidat na komunidat di Kòrsou pa ta partísipe den optimalisashon i mantenshon di playanan públiko. Ku esaki e ministerio di SMN ta spera di fortifiká partisipashon di komunidat den patrimonionan natural.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: