”Parlamentario di PIN ta kumpli na òrdu”.

”Parlamentario di PIN ta kumpli na òrdu”.

Kòrsou- Frakshon di PIN a tuma nota di e alegashonnan hasí riba asistensha na reunionnan di, entre otro, IPKO na Hulanda dor di Parlamentario Rennox Calmes. E alegashonnan sin base ta sali netamente for di un parlamentario ku den ultimo dos añanan a kobra mas ku 300.000 florin di pueblo i no ta aparesé na boka di trabou pa hasi lokual plaka di pueblo ta paga pa e hasi. 

Parlamentario Calmes a bai resientemente Hulanda komo parti di e delegashon parlamentario di Kòrsou pa partisipashon na reunion di IPKO i otro reunion di interes pa desaroyo di Kòrsou. Despues di partisipá den e reunionnan “bipartite” entre Kòrsou i Aruba,  sr. Calmes a kumpli ku su deber den IPKO kabalmente, dor di asistí na entre otro reunionnan. Tópikonan ku a keda tratá na e reunionnan ku sr. Calmes a asisití ta e situashon di e krísis na Venezuela i metanan internashonal pa desaroyo sostenibel (Sustainable Development Goals). Meskos ku su koleganan di Parlamento, sr. Calmes tambe a hasi bishita di kortesia na Rei Alexander. Huntu ku otro miembronan di Parlamento Sr. Calmes a bishitá entre otro “Rotterdam” i “The Hague Airport” i un rekorido den un bario modelo den e suidat di Rotterdam i na “Stadhuis” di Rotterdam. 

Meskos ku na Kòrsou i na Hulanda, den praktiká durante reunionnan, Parlamentarionan sa bandoná sala pa otro trabounan parlamentario,  e.o. komuniká ku prensa i hasi uso optimal di e tempu limitá ku tin na Hulanda. Durante su biahenan di trabou pa Hulanda, sr. Calmes ta dediká kobersashonnan ku otronan, mustrando su interes pa Yunan di Kòrsou bibá na Hulanda i instanshanan pa esakinan, organisashonnan Hulandes ku lo por ta di interes pa desaroyo di i na Kòrsou i Yunan di Kòrsou. Esaki no tabata eksepshon durante su último biahe di trabou na Hulanda. E biaha aki sr. Calmes a bolbe bishita organisashonnan, eventonan i tambe a tuma tempu pa kombersá ku entre otro nos profeshonalnan ku tin deseo di regresá Kòrsou. 

Atrobe ta di lamentá ku netamente esun ku a kobra ya mas ku 300.000 florin di pueblo sin ta hasi su trabou di Parlamentario, pero ta sinta den un kamber tur na potoshi bendiendo artikulonan inferior en buska pa kibra hobennan Parlamentario. E kansion di tur dia di sr. Dos Santos a para bira un lektura na pueblo kon ta kue sen, lokual e ta eksperto aden, enrikese su mes komo parlamentario i broma ku su rikesa, sin ta kontribuí ku nada na bienestar di esnan ku mas mester. 

No opstante ku PIN tin solamente un representante den Parlamento,  su parlamentario Calmes, lo keda hasi su máksimo esfuerso pa hasi su trabounan riba tur area di gobernashon mas kompleto posibel. Ironia di bida pero realidat palpabel ta ku e kultura di bringa otro i e set di kibra otro ta netamente un dje puntonan di atenshon ku algun di nos profeshonalnan hóben, den kombersashon ku sr. Calmes, a trese dilanti i ku a keda publiká den su mas resien komunikado pa prensa di su bishita na Hulanda.

 

Alvin Daal, 

Presidente di Partido PIN