Willemstad – Ministerio di Tráfiko, Transporte i Planifikashon Urbano ta informá públiko en general ku tin un kambio den e situashon di sirkulashon di tráfiko i posibilidat di parker den área di Rif. E kambio den sirkulashon di tráfiko a tuma lugá na altura di e rotònde dilanti di hòspital nobo, Curaçao Medical Center (CMC). E kambio aki  den e situashon di tráfiko a inisiá den e siman di 26 di yüli 2019. Tambe a bin kambio den e posibilidatnan di parker den área di Rif.

Ehekushon di e promé fase di “programa Rif” a kuminsá. Preparashonnan pa e konstrukshon di e hotèl Courtyard Marriott a kuminsá, ku konsekuensha ku hotèl Courtyard Marriott a sera e tereno di e hotèl.

Esaki ta nifiká ku lo sera e kaminda temporal ku tabata konektá e rotònde dilanti hòspital nobo ku e kaminda ku ta kore banda di Stadion di Rif dilanti di SVB. Tambe e lugá pa parker ku ta ser usá awor riba e tereno di hotèl Courtyard Marriott a kaduká.

Ministerio di Tráfiko, Transporte i Planifikashon Urbano ta pidi tur outomobilista pa tene kuenta ku e kambionan aki, sigui instrukshon di e bòrchinan di tráfiko i kore ku koutela den e área aki.