Konseho Kultural Kòrsou ku enkargo pa Premio Boeli van Leeuwen.

Konseho Kultural Kòrsou ku enkargo pa Premio Boeli van Leeuwen.

Willemstad- entrante aña 2019 Konseho Kultural Kòrsou tin e enkargo pa ku e preparashon di e prestigioso “Premio Boeli van Leeuwen”.
Promé ku esaki e preparashonnan tabata wòrdu realisá dor di un asina yamá Adviesraad Premio Boeli van Leeuwen, ku na aña 2017 no por a hasi e trabou. A lanta e ora ei un komishon ad-hoc pa tòg por a hasi e trabou i enkargo di e Premio na 2017. Mientras tantu gobièrnu a yega na un entendimentu ku Konseho Kultural Kòrsou pa e órgano aki tuma e enkargo di e Premio aki den futuro.

Premio Boeli van Leeuwen ta un premio ku for di aña 2009, ta keda otorgá kada dos aña na un òf mas persona òf organisashon ku a alkansá prestashon intelektual ekselente riba tereno kultural, hurídiko, gubernamental, sosial òf periodístiko.
E prestashon di e ganador mester ta unu ehemplar, e mester inspirá i habri bista di komunidat i e mester surpasá frontera di Kòrsou.
Entrega di e premio ta tuma lugá riba 10 di òktober, kada dos aña, riba e fecha natal di Boeli van Leeuwen. E siguiente Premio Boeli van Leeuwen ta keda otorgá dia 10 òktober 2019.

Banda di e Premio Boeli van Leeuwen ku a keda otorgá pa promé biaha na 2009, Konseho Kultural Kòrsou tin den su enkargo alabes e Premio Cola Debrot for di 1968. Premio Cola Debrot ta keda otorgá den un di e siguiente kategorianan: arkitektura, arte visual, baile, folklor, literatura, músika, teater of siensia.
Alabes Konseho Kultural a risibí e enkargo di e Premio Charlwin “ Broertje” Marshall, un premio pa hoben i riba tereno kulinario, ku a keda otorgá pa promé biaha den mei 2019.

Finalmente ta importante pa informá komunidat ku Konseho Kultural Kòrsou ta pasando den un transformashon, resultando den un ampliashon di su tareanan i asumiendo un ròl mas prominente riba tereno di konsehonan kultural na gobièrnu di Kòrsou.

 

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: