Elsa Rozendal di MAN: Protekshon di konsumidó pa posibel subidanan di preis inhustu
Elsa Rozendal di MAN: Protekshon di konsumidó pa posibel subidanan di preis inhustu
Frakshon di MAN a tuma nota di un komunikado ku Gobièrnu a emití dia 1 di ougùstùs último ku título: “Ahustenan finansiero ta drenta na vigor 1 sèptèmber benidero”. Den e komunikado aki, Gobièrnu ta hasi un yamada na komunidat kompleto pa for di awor aki yuda presta bon atenshon riba preisnan den merkado pa evitá posibel subidanan inhustu.
Rozendal ta indiká ku Gobièrnu sin embargo nò a duna splikashon kon e komunidat i konsumido, mester atendé ku e posibel subidanan inhustu, ni tampoko unda e konsumido por akudí ora ku e konstatá e posibel subidanan inhustu.
Pa un komunidat por yuda presta atenshon, na promé lugá, e mester ta bon informá i konsiente di kiko ta e preisnan ku e mester paga realmente, segun Rozendal. Espesialmente e produktonan ku lo bai oumentá a konsekuensia di medidanan anunsiá ku lo drenta na vigor 1 di sèptèmber próksimo. Pero tambe esnan general i den Makutu Básiko.
Den e kuadro aki Rozendal a manda e siguiente preguntanan pa minister di Desaroyo Ekonómiko.
- Kon Gobièrnu tin intenshon pa protehá e konsumido kontra di posibel oumentonan inhustu?
- Unda e konsumido por akudí pa hasi keho di un oumento inhustu?
- Kon regular Gobièrnu ta kontrolá preisnan, ta hasi komparashon di preis i ta sanshoná komersiantenan ku ta oumentá esakinan desproporshonalmente?
- Gobièrnu tin intenshon di kuminsá ku un kampaña rigoroso pa informá komunidat riba preisnan di produktonan, espesialmente esnan den Makutu Básiko?
- Gobièrnu tin intenshon pa konsientisá hendenan pa hasi mas uso di produktonan den Makutu Básiko?
- Ki posibilidat tin pa amplia Makutu Basiko ku e siguiente produktonan: habon pa baña, pasta di djente i deodorante.
