Prome Minister Evelyn Wever-Croes: E compromiso di Gobierno di Aruba ta pa realisa e metanan cu nos a propone: TURISMO Y ECONOMIA TA CRECIENDO MIENTRAS CIFRA DI DESEMPLEO A BAHA

Prome Minister Evelyn Wever-Croes: 

 

E compromiso di Gobierno di Aruba ta pa realisa e metanan cu nos a propone:

TURISMO Y ECONOMIA TA CRECIENDO MIENTRAS CIFRA DI DESEMPLEO A BAHA

 

Prome Minister Evelyn Wever-Croes a expresa su alegria cu e bon noticia di e rumbo cu turismo ta bayendo bou di e gobernacion aki. “Turismo ta crece y ta sigui crece”. E RevPAR, e cambernan na prijs, a subi cu 7.8% compara cu e temporada di aña pasa. E cantidad di turistanan cu ta bishita nos isla a subi y ta lagando 500 miyon florin adicional den nos economia compara cu e aña anterior.

 

Banda di crecemento di turismo, nos economia tambe ta creciendo. Pa e aña aki, IMF ta premira crecemento economico di 2.4% y pa otro aña nan ta premira crecemento di 3%. E crecemento aki, Prome Minister ta indica cu ta debi na e esfuersonan di Gabinete Wever-Croes pa desaroya nos economia. 

 

Algun siman pasa, Minister di Labor tambe a informa cu desempleo ta bahando. Cifra di desempleo a baha te na 7.3%. Esaki ta pone Aruba riba lista di desempleo den region cu desempleo mas abou. 

 

“Apesar cu ainda nos no ta unda nos mester ta, pero nos ta riba e bon caminda cu turismo cu ta creciendo, un economia fuerte cu ta birando mas fuerte cada biaha, y desempleo cu ta bahando. Esaki ta e compromiso di Gobierno di Aruba y nos lo sigui traha dia y anochi pa realisa e metanan cu nos a propone apesar di tur reto financiero”, Prome Minister a enfatisa.

 

Prome Minister a duna di conoce cu den tur e situacion aki, Gobierno no a enfoca solamente riba crecemento di economia y di turismo. Pero a enfoca mas riba e ser humano poniendo e ser humano central. P’e motibo aki tambe, a cuminsa pa hisa salario minimo cu AWG 53,-. A baha loonbelasting pa e clase trahado y a amplia canasta basico y awo tin mas control di prijs tumando luga compara cu añanan anterior. 

 

“Nos sa cu e costo di bida ainda ta halto. Pero cu e aumento di salario, rebaho di impuesto riba entrada y mas control di prijs, nos tin siguransa cu nos lo yega na controla e parti aki tambe. Cu poder di Dios, cu perseverancia, fe y positivismo, y cu e sosten di tur ciudadano, nos ta logra esaki tambe”, Prome Minister Evelyn Wever-Croes a expresa.