Konkurso: “Bibando ku Libertat”, Konmemorashon 23 – 08 – 2019

‘Bibando ku Libertat’

Konmemorashon di Dia Internashonal pa Abolishon di Sklabitut i Negoshi di Katibu.

Pa konmemorá Dia Internashonal pa Abolishon di Sklabitut i Negoshi di Katibudia 23 di ougùstùs próksimo, 7or pa 9or di anochi na Biblioteka Nashonal Kòrsou, bin skucha e ganadónan di e konkurso titulá: “Bibando ku libertat”.  

Mundialmente dia 23 di ougùstùs ta e fecha riba kua ta konmemorá abolishon di sklabitut i negoshi di katibu. E anochi di 22 pa 23 ougùstùs 1791 na Santo Domingo (awendia Haiti i Republika Dominicana) a tuma lugá e lantamentu di personanan sklabisá ku ta tin un ròl krusial pa yega na abolishon di sklabitut i e nogoshi di katibu. E lantamentu aki a sirbi komo inspirashon pa e lantamentu ku a tuma lugá 17 di ougùstùs 1795 na Kòrsou, enkabesá pa e.o. Tula, Bastiaan Karpata i Luis Mercier.  Finalmente promé di yüli 1863 Hulanda tambe a proklamá komo dia di emansipashon pa  kolonianan Hulandes.

23 di ougùstùs lo keda pa semper marka den historia komo un momentu krusial ku a  influensiá ku awendia na Kòrsou nos ta biba liber di sklabitut di e nogoshi di katibu i ta meresé pa nos pone atenshon na e fecha importante aki. Na aña 2019 kon habitante nan di Kòrsou ta eksperensiá nan libertat? Nos tin balor di e hendenan ku a duna nan bida pa nos por ta liber awe?

Pa haña algun kontesta Komishon Nashonal di UNESCO Curaçao, Fundashon NAAM, Plataforma di Sklabitut i Herensia di Sklabitut, Fundashon Biblioteka Nashonal Kòrsou, Fundashon Kas di Kultura ku koperashon di Sektor di Kultura i Deporte a organisá un konkurso di skirbi titulá: ‘Bibando ku Libertat’. Partisipantenan por a skirbi òf un kuenta òf un poema presentando nan pensamentu kon nos ta bibando ku libertat awendia.

Djabièrnè, 23 di ougùstùs 2019, di 7or pa 9or e tres promé finalistanan di kada kategoria lo presentá nan teksto ganadó na públiko i lo hasi entrega di e premio na e ganadónan di e konkurso aki den Museo Literario di Biblioteka Nashonal Kòrsou. Entrada ta grátis. 

Pa mas informashon por tuma kontakto ku sra. Nifa Ansano na bibandokulibertat@gmail.com of via whatsapp +599 9 6947587.