Barionan no ta wòrdu limpia debidamente, ku konsekuensia ku malesanan ta al órden di dia den diferente bario, Ministernan Jesus-Leito i Camelia-Romer, mester asumí nan responsabilidat i mantené Kòrsou limpi
Barionan no ta wòrdu limpia debidamente, ku konsekuensia ku malesanan ta al órden di dia den diferente bario, Ministernan Jesus-Leito i Camelia-Romer, mester asumí nan responsabilidat i mantené Kòrsou limpi
Komo hòmber di pueblo, ku diariamente ta bishita diferente barionan di Kòrsou, mi a konstatá ku gobiernu di Kòrsou no ta kumpli ku su tarea di mantené nos barionan limpi pa asina krea un medio ambiente mas sano i tambe pa prevení kualkier malesa ku por wòrdu okashoná pa e sushedat.
Firmante durante di un di su bishitanan di kustumber den e bario di Montaña Abou, a ser aserka dor di hopi abitante. Nos a risibí hopi reklamo di nan parti i pregunta di nan tabata; “Ta kiko e bario di Montaña Abou a hasi e aktual gobièrnu, ku nan no ke duna atenshon na limpiesa di roinan i plenchinan den e bario ariba menshoná”.
E abitantenan ta eksperensia hopi muskita, sangura, djaka i otro insektonan. Tambe nan a sigui splika, ku nan ta eksperensia holónan desagradabel ku nan mester soportá di bestianan morto ku ta wòrdu tira den e roinan.
E situashon ku nos a tuma nota di dje ta unu hopi preokupante. Nos sa ku tin mas bario ku ta pasando den e mesun situashon aki i ku gobiernu no ta tuma ningun akshon pa remediá e situashon aki. Si nos kier bende nos mes komo un isla turístiko, limpiesa mester ta na promé lugá i esaki no solamente den areanan turístiko pero hinter Kòrsou mester ta limpi.
E último akshon grandi di limpiesa ku a tuma lugá tabata esun organisá pa MFK i fundashon Gerrit Schotte, kaminda a limpia diferente barionan di Kòrsou i a rekohé un kantidat rèkert di 1.4 mion kilo di sushi. Si e dos organisashonnan aki por a hasi un gran parti di Kòrsou limpi, ta dikon e Ministernan konserní no por laga hasi Kòrsou limpi?
Suskrito kier rekordá Ministernan Jesus-Leito i Camelia-Romer, lo siguiente;
- Ku ta bosnan tarea i deber komo gobiernu pa mantené roinan i plenchinan den diferente bario di Kòrsou limpi
- Debí ku e plenchinan i roinan ta hopi sushi, ku esaki por kondusí na malesanan manera dengue i Chikungunya
- Ku nos ta aserkando temporada di Orkan i por spera basta áwaseru ku lo por trese problema si e roinan ta asina sushi
- Ku gobièrnu no ta kumpliendo, ku e maneho primintí di un medio ambiente limpi i bunita pa Kòrsou
- Ku e malesa di dengue ta plamá den Latino Amérika i ta biniendo direkshon islanan di Karibe
Pa medio di esaki mi kier hasi un súplika riba e Ministernan konserní pa no tarda pa kuminsá, ku akshonnan di limpiesa rònt Kòrsou. Kada dia ku wòrdu neglishá ta forma un peliger pa salú di nos komunidat. Suskrito ta spera di mira pronto, ku a kuminsá ku e akshonnan di limpiesa.
Juniël R. Carolina
Miembro di parlamento pa MFK
Athunto: Diferente potrèt pa ilustrá e situashon.
