TA ASINA ‘KI NOS LO SIGUI BIBA BAI?

TA ASINA ‘KI NOS LO SIGUI BIBA BAI?
Kòrsou pa hopi aña i òf hasta dékada ta konfrontá ku un estilo di gobernashon ku no tin ningun klase di profundidat. Gobernantenan nunka no a goberná Kòrsou a base di un vishon definí ni tampoko no ta konsiente di nos rekursonan limitá, di manera ku ta pone padilanti pa enfoká riba desaroyo i progreso di e pais i e pueblo aki. Tin paisnan kaminda gobernantenan a logra alsa e nivel di bida pa e komunidat, dunando direkshon i poniendo ku e pais i su komunidat di bèrdat a progresá. Pero mester tabatin komo punto di salida sirbi bienestar di e pueblo, teniendo kuenta ku e nesesidatnan di e komunidat awor i den futuro. Den nos kaso aki na Kòrsou pa kuminsá nos sistema di hasi polítika ta unu mará na e modelo di konflikto i antagonismo. Esei ke men ku no por traha planifiká ni planiá, pasobra tur tempu mester bai na zundra otro, duna otro mal nòmber. Un bon plan of inisiativa di un gobièrnu na mando, e siguiente gobièrnu ta hal’é pone un banda, pasobra no ta e a bini ku e idea. Kiko ta hasiendo ku e prendanan úniko di nos naturalesa, ku ta nos playanan? Mira kon ta anda ku nos playanan, no ta e komunidat di e pais ta bini na promé lugá si ta trata di nos playanan, sino invershonistanan. Si mester konstruí kualke hotèl, anto ta 100 porshento sigur ku lo sakrifiká tereno atrobe, e pueblo mester para na banda mira kon ta entregá parti di su teritorio, esta su playa i otro fasilidatnan importante. No tin prioridat pa edukashon ni pa formashon di miembronan di e komunidat aki, ku al final tòg ta e rekurso mas prinsipal si un pais ke progresá. Pero, nunka no a duna prioridat na maneho di e rekurso humano! Avionnan yen di studiante ta subi na aeropuerto Hato pa sali djei tur aña ku na bordo sentenáres di studiante, kendenan nunka mas no ta regresá e isla aki. P’esei mesora ta surgi e pregunta kon un pais ta hasi konosé adelanto i progreso bou di e tipo di kondishonnan ariba menshoná?
Aki na Kòrsou ta asina ku mayoria gobernante ta wak pa su mes, pa su famia i amigunan. Kòrsou no opstante tur lei eksistente, simplemente ta un wild, wild west, pasobra no ta traha pa logra adelanto di e totalidat. Kada ken ta wak pa su mes! Komersiantenan ta chika pueblo ku preisnan deskomunal. E situashon di sueldonan ta otro problema serio, pasobra gran mayoria di e komunidat ta wantá na sueldo mínimo, anto esei ta nifiká ku suidadanonan di Kòrsou en prinsipio no por sali for di nan gastunan di tur dia. Kua polítiko òf dirigente ta tribi pone man riba e situashon real ku nos pais ta aden, kaminda aña aden aña afó no a goberná ku un vishon pa manda e pais aki padilanti? Aki nos tei puramente pa zundra otro, benta falta riba otro, ofendé otro, t’esei ta nos kultura, nos sistema di anda ku otro! Skucha reunionnan di parlamento, nunka no ta sali un espíritu di pais ku ta brota di energia positivo, poniendo konfiansa den futuro ku e determinashon nesesario pa pone kosnan den e konteksto di adelanto. Aña aden aña afó kosnan a kana di e manera ariba menshoná. Meskos ku ta den gobernashon, ta den pueblo tambe, un káos grandi nos sistema di biba ta. Berdaderamente destrukturá e isla aki ta. Pues no ta e krísis finansiero ekonómiko tin Kòrsou stanká, sino for di prinsipio nos pais ta kaótiko hinká den otro, no tin union, no tin e boluntat pa kombiná konosementu i talento ku otro. Nò rumannan, e problemanan di Kòrsou ta muchu mas grandi i muchu mas profundo ku nos ke aseptá. Hendenan ni sikiera ta respetá otro, bida di hende awendia no bal nada, prueba di esei ta e tantísimo kasonan di likidashon ku a bin ta tuma lugá durante último añanan. Asesinatonan kruel ta tuma lugá plenamente na sitionan públiko. Awor, e gritu ku nos mes no por, no ta basá riba bèrdat, e gritu ei ta puramente pasobra nos mes no ta aseptá nada di otro, anto ta preferá hinka tur kos den man di Ulanda numa. Enfin, Kòrsou birando mas shushi di Bándariba te Bándabou, anto ku su tantísimo problema akumulá.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: