Prome Minister Evelyn Wever-Croes: Na final di e encuentro cu stakeholders PROME MINISTER A GRADICI CADA UN PA E CONTRIBUCION POSITIVO Y CONSTRUCTIVO
Prome Minister Evelyn Wever-Croes:
Na final di e encuentro cu stakeholders
PROME MINISTER A GRADICI CADA UN PA E CONTRIBUCION POSITIVO Y CONSTRUCTIVO
Diaranson y diahuebs a tuma luga pa prome biaha un encuentro riba Reforma Fiscal entre Gobierno di Aruba y diferente stakeholders. Prome Minister y Minister di Finansa y Asuntonan Economico tawata presente na e encuentro importante aki. Prome Minister Evelyn Wever-Croes, na ciere di e encuentro aki, a gradici presencia di tur stakeholders y organisadornan di e proyecto aki y a expesa su deseo cu e reunionnan asina por tuma luga mas sigui.
“Boso presencia y contribucion na e evento aki ta hopi importante. Contribucion positivo y constructivo pa yega na e sistema di impuesto cu por yuda nos avansa como pais”, Prome Minister a expresa.
E mandatario principal di nos pais a gradici DIMP, Duane como tambe e expertonan di Wetgeving, y tur otro departamento cu ta yuda Gobierno di Aruba den e sistema di impuesto nobo. Esaki sigur no ta un tarea facil.
E encuentro aki ta un encuentro historico siendo e prome encuentro di e indole aki cu stakeholders. Prome Minister a indica desde cu e mes tawata traha den e Departamento di Impuesto, e deseo di e Departamento semper tawata pa wordo envolvi den e cambionan cu Gobierno ta introduci.
“E siman aki, mi a experencia e deseo aki bira realidad. Un dia cu mi a defende. Fuera di politica, esaki ta un encuentro di hendenan profesional y e discusionnan y e contribucion ta na un nivel profesional”, Prome Minister a duna di conoce.
Prome Minister a indica cu e e siguiente paso awo ta cu e contribucion di e idea, pensamento, sugerencia, opinion y critica ricibi di e stakeholders, lo wordo evalua internamente pa tin un miho vision pa yega na un proposicion con esaki lo yuda tambe pa fiha e rumbo cu Aruba mester bay pa yega na un finansa publico duradero y saludabel.
Prome Minister Wever-Croes a finalisa su mensahe di clausura cu un dicho cu ta bisa na Ingles: “Doing it on time, we can weather the storm, trying to do it when it is too late, the storm will deal with you”.
“Como Minister, tin biaha mi a haya e sentimento cu e tormenta a encarga di nos caba sin cu nos a tuma desicionnan tempran y na tempo. E discusionnan di e dos dianan aki, mester a tuma luga hopi aña pasa caba. Sinembargo, riba un nota optimista, nunca ta laat pa cuminsa. Pa e motibo aki tambe a bin cu e encuentro aki, pa nos haya boso contribucion pa asina hunto nos atende cualkier tormento cu por bin”, Prome Minister a enfastisa.