Agente polisial arubiano ta mata su famia i kometé suisidio na Dordrecht, Hulanda 

Djaluna anochi alrededor di 18.30 ora di Hulanda, a tuma lugá un kaso di tiroteo na un bibienda den Heimerstein na Dordrecht. Na promé instante tabata tin tres morto i un viktima hopi grave heridá komo resultado di e tiroteo aki. Tata di e famia en kuestion, Wendell ‘Juni’ Cardoze a tira su esposa i nan dos yunan pa despues kometé suisidio. E señora na promé instante a resultá hopi grave heridá i a keda transportá ku urgensia pa hospital. E señora, Marjori Gressman, tambe a fayesé despues a konsekuensia di heridanan ku el a risibí. Bisiñanan a bati alarma mesora i varios unidat polisial, ambulans i trauma helikòpter a akudí na e sitio pa duna asistensia.

Wendell Cardoze prosedente di Aruba, ta un agente polisial i el a hasi uso di su arma reglamentario pa kometé e akto aki. Informashon preliminar ta duna indikashon ku tabata tin un problema entre e pareha ku a eskalá di e forma aki.

Pas na alma di e defuntunan i forsa na famianan