Di dos Konferensia: E Persona Ideal pa Kòrsou

Di dos Konferensia: E Persona Ideal pa Kòrsou

Geplaatst op 19 Sèptèmber 2019 dor di Ministerio di Enseñansa, Siensia, Kultura & Deporte

WILLEMSTAD – Ministerio di Enseñansa, Siensia, Kultura & Deporte a tene e di dos konferensia di “E Persona Ideal” pa Pais Kòrsou. E konferensia di e persona ideal pa Kòrsou ta trata e aspekto di enseñansa ku ta di vital importansia pa e habitante por keda formá konforme su kapasidat, mentalidat i su sentido di responsabilidat pa e bienestar den e mundu moderno ku ta sigui desaroyá kontinuamente.

E konferensia a tuma lugá djaweps 19 sèptèmber na WTC/SSO di 14:00 pa 17:00. E atardi a keda guiá pa sr. Sergio Everon komo moderadó. Minister di Enseñansa, Siensia, Kultura & Deporte sra. Marilyn Alcalá-Wallé a hiba palabra kaminda ela presentá su perspektiva komo representante di gobièrnu mustrando riba e maneho di pais i su posishon komo nashon den Karibe.

Durante di e konferensia dos orador di órden a hiba palabra for di nan perspektiva kon nan ta mira e Persona Ideal pa Kòrsou. Ordadornan di órden parlamentario hubenil sr. Fergino Brownfill a tene un disertashon kaminda ela presentá e perspektiva di un hóben ku ke mira un futuro positivo pa e pais den desaroyo. Sra. Shelomi Doran-Bakhuis komo hóben adulto a duna su perspektiva di tópiko ku e balornan manera integridat, responsabilidat, fieldat, lealtat, respèt, desaroyo di kapasidat i desensia ku ta di gran balor pa e formashon di e “Persona Ideal” pa pais Kòrsou. Hóbennan di Excel Arts Academy tambe a tene varios presentashon artístiko.

Despues a sigui ku un diálogo entre e panelistanan i e públiko kaminda tur hende a haña oportunidat pa dialogá i debatí ku otro riba e tema. Oradornan di òrden di e promé konferensia tambe a forma parti di e tim di panelistanan ku a sa di dialogá i debatí riba e tema den un ambiente hopi profeshonal i positivo.
Ministerio di Enseñansa, Siensia, Kultura & Deporte por mira bèk riba un konferensia eksitoso kaminda e meta pa ban traha riba e proyekshon di e karakteristikanan di e suidadano di nos nashon definitivamente a keda proyektá.

KOMUNIKASHON

**riba e potrèt por tuma nota di momentu di apertura dor di nos Minister sra. Marilyn Alcalá-Wallé i na momentu di diskurso di e oradornan i presentashon di e partisipante di Excel Arts Academy.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: