Zr.Ms. Groningen ta reskatá seis piskadó Venesolano

Zr.Ms. Groningen ta reskatá seis piskadó Venesolano
Djabièrnè último e barku di Marina Real Zr.Ms. Groningen tabatin un operashon di buskeda i reskate
eksitoso 60 mia nort di Boneiru. Durante e operashon akí e barku a reskatá seis persona di nashonalidat
Venesolano.
Durante e anochi di 19 pa 20 di sèptèmber e avion Dash di Wardakosta a nota un boto di piskadó ta drif
ku algun persona na bordo ku tabata zuai pidiendo yudansa. E tripulashon di Dash a pidi e barku Liberty
Bay, ku tabata nabega den bisendario, pa bai na e lokalidat di e boto di piskadó ku e nòmber Eudismar pa
wak nan situashon. Mesora e Sentro di Reskate i Kordinashon di Wardakosta a notifiká Zr.Ms. Groningen
pa e barku por duna asistensha na e tripulatenan di Eudismar. Na yegada di Groningen, e tripulantenan di
e barku di piskadó a indiká ku nan tin 18 dia ta drif riba laman despues ku nan motornan a daña. Nan a
bisa ku na a asta pèrdè speransa ku nan lo por ser reskatá.
E tripulantenan di Groningen a duna e personanan riba e boto di piskadó kuminda, awa i asistensha
mediko. E tékniko di e barku di Marina Real a arma un di su motornan riba e boto di piskadó. Bou di guiá
di Groningen Eudismar a nabega bai Boneiru. Na yegada ayera e tripulantenan di Eudismar a ser entregá
na Wardakosta i Marechaussee. Tambe nan a haña asistensha mediko na hospital na Boneiru.
Trabounan di Zr.Ms. Groningen
For di 20 di aprel 2019 Zr.Ms. Groningen ta aktivo den Karibe. E barku di Marina Real ta duna asistensha
den operashonnan di droga i yudansa humanitario. Banda di e trabounan akí e barku kual ta bou di
komando di kapitan-lùitenant Nicole Kuipers, ta ehersé tareanan pa Wardakosta den laman Karibe
manera entre otro, detektá peska ilegal, delitonan den e medio ambiente marítimo i yudansa den
trabounan di buskeda i reskate. Pa por ehersé e tareanan akí e barku di Marina Real tin dos FRISC na bordo
i un helikòpter NH-90.