KAMPAÑA DI INFORMASHON DI MEO HUNTU KU FUNDASHON PA KONSUMIDÓ: TA BO PÒTMÒNI, TA ABO TA DISIDÍ. KUMPRA KONSIENTE

KAMPAÑA DI INFORMASHON DI MEO HUNTU KU FUNDASHON PA KONSUMIDÓ: TA BO PÒTMÒNI, TA ABO TA DISIDÍ. KUMPRA KONSIENTE

Geplaatst op 23 Sèptèmber 2019 dor di Ministerio di Desaroyo Ekonómiko

WILLEMSTAD- Ministerio di Desaroyo Ekonómiko (MEO) i Fundashon pa Konsumidó konhuntamente a lansa un kampaña ku e meta pa trese mas konsientisashon na e konsumidó en bista di e situashon ekonómiko ku nos pais ta pasando den dje na e momentunan aki.

 

Den kuadro di e oumento di OB ku a drenta na vigor entrante 01 di sèptèmber último, minister di Desaroyo Ekonómiko, sra Giselle Mc William a emití un komunikado resientemente den kual el a hasi un apelashon na komersiantenan pero tambe a alerta e konsumidó pa ta mas konsiente na unda i di ki manera esaki ta gasta su sèn.

Manera ya ta konosí, e departamento di Inspekshon Ekonómiko di Ministerio di Desaroyo Ekonómiko(MEO) regularmente ta hasi kontrolnan rutinario den entre otro, minimarket, toko i supermerkadonan. Un di e aspektonan ku Inspekshon Ekonómiko ta paga tinu riba dje durante e kontrolnan aki ta preis di e produktonan ku ta regulá pa medio di Makutu Básiko. E Makutu Básiko ta kontené 22 tipo di produkto básiko di kual Gobièrnu ta periódikamente ta regulá e preis máksimo. E lista ku e 22 kategorianan di produkto ku ta kai den makutu básiko, ta optenibel riba e página di www.gobiernu.cw.
Pa loke ta trata tur otro produkto pues ku no ta kai bou di makutu básiko, e komersiante ta liber pa pone su propio preis.
Banda di e kontrolnan di Inspekshon Ekonómiko, Fundashon pa Konsumidó regularmente a bin ta publiká komparashon di preisnan serka e diferente komersiantenan ku e meta pa por yuda e konsumidó hasi un mihó eskoho na unda e ta gasta su plaka.

Konsiente ku kisas algun komersiante lo por usa e oumento di OB komo un motibu pa oumentá preis di produktonan drástikamente den su establesimentu, MEO i Fundashon pa Konsumidó, ku sosten di minister Mc William, a uni forsa den un kampaña informativo i interaktivo ku pueblo di Kòrsou. Durante di e kampaña e meta ta pa hasi e konsumidó mas alerta di posibel kambionan drástiko den preis i konsiente ku e desishon final na unda bo ta gasta bo plaka, ta den bo mes man. Mas ku klaro MEO i Fundashon pa Konsumidó no por tin wowo tur kaminda i pues nos ta pidi aporte di pueblo di Kòrsou den esaki. Si akaso bo a nota un kambio drástiko den preis di un produkto ku regularmente bo ta kumpra òf si akaso bo a nota un diferensia drástiko den preis di e mesun produkto den dos diferente establesimentu, saka un potrèt di e faktura òf di e preis riba rèki i manda esaki pa nos via whatsapp na +5999 511-1444.

Ku e informashon aki huntu ku e informashon ku nos optené durante kontrolnan rutinario, MEO huntu ku Fundashon Pa Konsumidó lo publiká periódikamente na unda sierto produkto ta mas ekonómiko pa e saku di e pueblo.

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: