Delegashon di Reino Hulandes presente na éksitoso Asamblea General di Nashonnan Uní

WILLEMSTAD – Dia 24 di sèptèmber último a tuma lugá apertura di e di 74 Asamblea General di Nashonnan Uní. Un delegashon di Reino Hulandes, konsistiendo di Rei Willem Alexander, Reina Maxima i Promé Ministernan di Hulanda, Aruba i Sint-Maarten, a biaha spesialmente pa New York pa partisipá na e evento importante aki. Huntu ku nan tambe ta presente entre otro Minister Blok di Asuntunan Eksterior i Minister Kaag di Komersio Eksterior i Desaroyo.

Durante e promé dianan di e konferensia Promé Minister Rhuggenaath ya a partisipá na vários presentashon i enkuentronan. E promé dia tabata kompletamente den kuadro di isla chikí den desaroyo, konosí komo SIDS (Small Island Developing States). Alabes a para ketu na e metanan internashonal pa desaroyo sostenibel, esta e ‘Sustainable Development Goals’ (SDGs). Dos tópiko ku sigur ta temanan sentral pa Kòrsou i pues propósito prinsipal di e bishita di Promé Minister na e evento aki.

Promé Minister Rhuggenaath tabatin tambe un enkuentro interesante i ameno ku èks presidente di Merka Bill Clinton, huntu ku lidernan den gobernashon di henter region Karibe i stakeholders / filántroponan ku ta operá riba nivel haltu. Tema di e enkuentro tabata kon pa rekuperá despues di un desaster, spesialmente islanan chikí ku ta vulnerabel i ku mester protehá nan mes tantu físikamente komo ekonómikamente kontra di gòlpinan eksterior. Aki Promé Minister Rhuggenaath a enfatisá e importansia pa islanan chikí ta bon prepará pa kualke situashon, ni maske bin un desaster natural òf no.

Na diferente okashon a reuní ku Rei Willem Alexander, por ehèmpel durante e seremonia di apertura pero tambe durante e ‘UN SDG summit’ ku a organisá pa promé biaha for di momentu ku a adoptá e agènda na 2015. Durante di e ‘summit’ diferente paisnan presente a duna un relato tokante progreso (logro i desafionan) di e metanan internashonal pa desaroyo sostenibel. Den transkurso di e konferensia Kòrsou tambe lo duna informashon mas ayá riba e parti aki durante vários evento.

E kuater paisnan den Reino a uni i hasi un rekorido serka diferente hende klave den Nashonnan Uní pa papia mas detayá riba temanan di relevansia ku ta varia di desaroyonan den Karibe te ku seguridat i pas entre paisnan na mundu. Tambe a sigui e spichnan di Rei Willem Alexander, kaminda el a elaborá tokante desaroyo i futuro di Nashonnan Uní na kaminda pa 75 aña di eksistensia. Aki Rei Willem Alexander a hasi uso di e oportunidat pa ilustrá nos situashon atraves di e tópiko “the 1 Kingdom, 4 countries” i el a hasi un súplika pa mas dedikashon i sosten na islanan chikí den desaroyo.

Na final di e Asemblea General di Nashonnan Uní lo duna un siguiente relato pa asina komunidat keda informá di tur desaroyo.