Kontròl parlamentario: mas pregunta over di ehekushon di Presupuesto 2019 di Pais Kòrsou.

Kontròl parlamentario: mas pregunta over di ehekushon di Presupuesto 2019 di Pais Kòrsou.

Parlamentario Curtley Obispo den e reunion di Komishon Sentral di Parlamento di Kòrsou di dia 4 òktober 2019, a hasi mas pregunta over di ehekushon di Presupuesto 2019 di Pais Kòrsou. Tur esaki den kuadro di entre otro: (a) su ròl di kontròl parlamentario, (b) su programa di kontròl parlamentario i (c) su análisis di sifra pa loke ta trata ehekushon di e Presupuesto 2019 di Pais Kòrsou. 

Ta trata di e siguiente preguntanan na Minister di Finansa i Gobièrnu di Kòrsou den kuadro di ehekushon di Presupuesto 2019  i Presupuesto Supletorio 2019 di Pais Kòrsou: 

(1) ki dia parlamentario Curtley Obispo ta haña den kuadro di su ròl di kontròl parlamentario, e kontestanan riba su 9 kartanan pendiente kontesta over di ehekushon di Presupuesto 2019 di Pais Kòrsou?;

(2) ki dia ta manda e kuentanan anual 2016 i 2017 di Pais Kòrsou pa Konseho di Konsulta (Raad van Advies) pa asina haña konseho riba esaki nan?. Ki dia? Petishon pa risibí e fecha konkreto den aña 2019 ku lo entrega esakinan na Konseho di Konsulta; 

(3) Kontrolaria General di Kòrsou den su karta di 20 sèptèmber 2019 na Parlamento di Kòrsou ta indiká: ku SOAB a konstatá un retraso den entrega di informashon dor di ministerionan di Gobièrnu di Kòrsou pa loke ta e audit di e kuenta anual 2018 di Pais Kòrsou. Preguntanan: ta bèrdat esaki?. Na e momento aki tur e informashon ta entrega na SOAB?; Ta kua ta e ministerionan ku no a kumpli na tempu ku entrega di informashonnan na SOAB? 

(4) Entradanan di Deelnemingsdividend BRK/NFR: (a) e 42.1 mion florin aki a drenta kaba riba kuenta di banko di Pais Kòrsou? ;(b) si no ta e kaso, e lo drenta riba kuenta di banko di Pais Kòrsou promé ku 1 yanüari 2020?; (c) e 42.1 mion florin ta over di kua añanan?; (d) tin mas aña ku Pais Kòrsou lo tin ku risibí esaki? Pa kuantu mion florin? 

(5) Entradanan di dividendo: (a) kua ta e kompanianan anónimo di Pais Kòrsou ku lo paga e dividendo pa un total di  23.9 mion florin; (b)kua ta e total pa kada kompania anónimo?; (c) desishonnan di akshonista (“AVA-besluiten”) di kada kompania anónimo pa pago di e dividendo (lo) ta formalisá promé ku 1 yanüari 2020?; (d) e sèn di e dividendonan  aki lo ta riba kuenta di banko di Pais Kòrsou promé ku 1 yanüari 2020?

(6) Pa loke ta finansa publiko di Pais Kòrsou: kua ta e metanan konkreto ku a logra despues di e Instrukshon di dia 12 yüli 2019?; 

(7) Tin retraso den pago di supsidio di koriente Aqualectra pa penshonadonan ku tin entrada di AOV so? . Ta bèrdat? Si ta bèrdat, e retraso aki ta reserva den Presupuesto 2019 di Pais Kòrsou? Si ta bèrdat, ki dia ta paga esaki?

 (8) Kua ta e maneho di Gobièrnu di Kòrsou pa loke ta trata kontròl i kobramentu di belasting pa ku bendementu di number den sektor di Wega di Number Kòrsou? Tin un maneho riba papel?

(9) ) Dikon e baha i koregí e 7.0 mion florin den entrada pa loke ta trata “verhaal pensioenpremies”?

(10) Kompensashon resultado negativo Kuenta Koriente di Pais Kòrsou añanan 2017 i 2018. Pa konfirmá, e pregunta ta si e ta basa riba e Instrukshon di 12 yüli 2019?

(11) Den e Presupuesto Supletorio 2019 di Pais Kòrsou “verbruik goederen en diensten” ta subi ku 24.0 mion florin i “subsidies/overdrachten” ta subi ku 12.7 mion florin. Pregunta: esaki tin di haber ku “voorafgaand toezicht” a faya?. Esaki tin di haber ku “verplichtingen stop” a faya?.

 (12) Kiko ta kousa di e siguiente kambionan den kontribushon di belasting di Pais Kòrsou den Presupuesto Supletorio 2019 pa loke ta trata: (a) winstbelasting ta baha ku 23.5 mion florin, (b) OZB ta subi ku solamente 1.8 mion florin, miéntras ku a introdusí un “aangifteplicht” entrante 1 sèptèmber 2019 pa mas ku 16000 objecten, (c) Invoerrechten ta baha ku 18.3 mion florin, (d) Akseins riba serbes ta baha ku 1.8 mion florin miéntras ku a subi tarifa di akseins entrante 1 sèptèmber 2019. Petishon pa risibí e faktornan konkreto i kousanan pa kada pregunta hasi. Pues kiko ta pasando. Nada di extrapolatie òf referensia na baha di aña 2018. 

(13) Kuantu sèn den mion florin Pais Kòrsou tin riba kaya pa kobra, pa loke ta trata: a) grondbelasting, b) successie- en overgangsbelasting, c) logeergastenbelasting, d) vergunnings en registratierecht i e)        landbouwgronden. Petishon pa risibí kontesta apart pa kada un pregunta.

(14) Tabèl 5 di e Nota di Finansa Presupuesto Supletorio 2019: kiko e 3.0 mion florin overige ta konsistí di dje?

(15) Pregunta a base di e  Akuerdo di Gobernashon 2017-2021, kua ta e status di adaptashon di e “Legesverordening”?. Lo adaptá e lei aki den aña 2019?