BAN ORGANISÁ KORSOU!!!

BAN ORGANISÁ KORSOU!!!

Tur suidadano sa ku e situashon sosial ekonómiko na Kòrsou ta deplorabel i ku esei ta notabel den nos barionan. Ke men hopi hende den kasnan di famia ta bibando den mizeria i pobresa, komo tal konfrontando ku mal nutrishon, sirkunstansianan di shushedat i a-higiéniko, desempleá i falta di perspektiva pa futuro. Pero komo konsekuensia di esaki oumento di krímen, esta atrakonan armá i ladronisia di outo. Anto awor ku e medidanan ku gobièrnu a tuma resien ku ta enserá subida di preisnan, e situashon lo empeorá. Ami ta puntra mi mes si parlamentarionan di awendia, kendenan ta konsiderá representantenan di pueblo ta ‘care’ realmente pa loke ta pasando na Kòrsou. Frankamente bisá ami lo a ferwagt maske ta un of dos parlamentario aktivo riba e tereno aki, ta kibrando kabes di bèrdat riba e situashon aktual na Kòrsou den nos barionan, presentando maske ta algun sugerensia konkreto pa kontradesí loke ta bayendo robes den e komunidat kurasoleño riba tereno di pobresa, deterioro sosial i mizeria. Laga nos ta franko, ken otro lo mester hasié anto? Den mi okupashon komo miembro di Konseho di hunta di Komisario di Fundashon Sentronan di Bario na Kòrsou (SEFBA), ami a trese na numeroso okashon padilanti ku mester tin klaridat riba kua ta e sistema(nan) adekuá pa atendé ku e sirkunstansia den barionan, esta esfuersonan konkreto pa subi kalidat di bida den nos barionan. Siendo Kòrsou tin 270 i piku bario i apénas 25 sentro di bario, ta un ridikules di marka mayó pa insistí ku e solushon pa pobresa, deterioro sosial i oumento di krímen ta den man di sentronan di bario. Sentronan di bario no ta ekipá ku personal, ni e rekursonan finansiero nesesario pa atendé ku e problemanan grandi manera ariba menshoná. Pió ainda ta e hecho ku nunka no a duna sentronan di bario e tarea òf enkargo pa traha di manera ku ta subi kalidat di bida den barionan. Segun mi a yega e momento pa Parlamento stipulá kua ta e papel ku barionan mester hunga den e totalidat pa por garantisá kalidat di bida den e komunidat aki. Semper ami a konsiderá BARIO komo un entidat balioso, e ángulo mas apropiá pa traha sistemátikamente na kreashon di un mihó Kòrsou. Pero si ta asina ei polítiko, gobernante i otro dirigentenan di e komunidat aki ta pensa bèrdat, anto a yega e momento pa definí i òf stipulá di kua manera por logra barionan stabil, riba e isla aki. Komo tal mester formulá puntonan di prioridat pa atendé den nos barionan, di manera ku di bèrdat ta logra situashonnan aseptá den barionan di Kòrsou. Pero, pa kuminsá mester tin registro di datonan konsiderá importante ku ta duna un bista di e sirkunstansia den kada bario. Por ehèmpel e estado di pobresa den kada bario, e grado di limpiesa i higiena, sifranan di desempleo, sirkunstansia físiko di kasnan i edifisionan públiko, sorto i nivel di krímen den bario, pero tambe e kantidat di habitante den bario, kuantu ta hende grandi, mucha, hende muhé, hende hòmber etcetera. Ta di ki sorto di bario ta trata, e ta un bario apto pa piskeria, pa fomentá turismo, pa plantashon of krio di bestia, hopi dirigí riba arte, músika, kultura, deporte etcetera? Rumannan, ta masha remarkabel ku maske a papia hopi aña i hasta dékadanan di bario na Kòrsou i ku polítikonan kada biaha den porta di elekshon ta lansa tur sorto di promesa, nunka ainda no tabatin esfuersonan konkreto pa haña un bista total di e sirkunstansia sosial ekonómiko di barionan. Pa fasilidat sikiera por a konsentrá riba zonanan anto, buska manera pa haña un bista real di e sirkunstansia sosial ekonómiko den e zonanan, anto pa a base di esei formulá maneho. Manera ta bayendo aktualmente, ami ta haña gobernashon parotin, kaminda tempu balioso ta bai pèrdè, en bes di enfoká ku konosementu i efisiensia riba progreso i adelanto di nos isla. Nos problemanan segun mi no ta kousá pa e krísis finansiero ekonómiko solamente, sino tambe pa un estilo di gobernashon parotin i kasi sin pia sin kabes di hopi aña.

Erwin Raphaëla