LES DI TRAFIKO GRUPO 6 DI SKOLNAN BASIKO

Tráfiko na Kòrsou
Ultimo añanan diferente persona a pèrdè nan bida riba kareteranan di Kòrsou. Muchanan
chikitu ta ser konfrontá kasi tur dia den entre otro medionan di komunikashon i riba kaya ku
aksidentenan ku ta tuma lugá. Mayoria biaha e aksidentenan ta ser okashoná pa motibu di
entre otro: velosidat haltu, uso di telefon ora ta manehá outo, keda sin bisti faya di seguridat
i e hecho ku outomobilistanan no ta mantené distansha for di e otro outo nan dilanti.
Grupo
Seis suidadano a bini serka otro un tempu pasa na un manera spontáneo pa mira kon nan
por kontribuí na hisa e kalidat di tráfiko sigur na Kòrsou. E konosementu di e miembronan di
e grupo ta diferente, pero loke nan tur tin komun ta e pashon pa tráfiko sigur na Kòrsou. E
grupo di persona ta traha independiente for di góbierno, patrosinadornan, otro
instanshanan i asosiashonan eksistente.
E personanan den e grupo ta: señor Elrick Ruiter – Inspektor di Korps Politie Curaçao/Senior
Beleidsmedewerker, señor Ivo Out – Fiskal, señor Jeroen Kienhuis – Rijschoolhouder/Rijinstructeur Commited Drivers, señor Leon Maarleveld – di Driver Academy Curaçao, señor
Melvin Cijntje – Verkeerskundig Ontwerper/Ministerio di VVRP i señor Yves Cooper –
periodista.
Lès di tráfiko na skolnan
E grupo ta dirigí nan mes ku un lès di tráfiko na grupo 6 di skol básiko. Un aña promé ku e
muchanan kuminsa haña e materia di tráfiko den grupo 7 ta para ketu riba tópikonan ku e
muchanan ta haña nan konfrontá kuné kasi tur dia. E tópikonan ta ser tratá na un manera
interaktivo ku videonan, animashonnan kortiku i ehersisionan pa mucha. E meta di e lèsnan
ta pa konsientisá e muchanan for di yòn di e peligernan ku un outomobilista por enkontrá
ora ta manehá outo.
Investigashonnan rònt mundu a demonstrá ku tin un efekto positivo riba e komportashon di
e muchanan ora atendé e temanan akí ku nan for di yòn. Na momentu ku nan mes bira
outomobilista nan ta resultá di ta mas konsiente den tráfiko. Banda di e esaki e muchanan ta
kompartí e informashon na kas ku nan mayornan i otronan, lokual ta resultá den
kombersashonnan tokante di e tópiko di tráfiko na un manera spontáneo. Tambe a ripará ku
e muchanan ta atendé nan mayornan riba uso di telefon i faha di seguridat ora ta kore outo i
ora mayornan ta kore nan outo ku velosidat muchu haltu.
Vigdis College
Resientemente e grupo akí a duna e promé lès di tráfiko interaktivo na alumnonan di Vigdis
Jonckheer-Mensing College. Durante di e lès kual a dura 60 minüt, diferente tópiko a ser
tratá i e muchanan a haña hopi espasio pa hasi pregunta. Algun miembro di e grupo a bisti
nan úniform di trabou pa duna e presentashon na skol;
señor Ivo Out – Fiskal a bisti su toga, Elrick Ruiter – Inspektor di Korps Politie Curaçao/Senior
Beleidsmedewerker a bisti su úniform di Polis i señor Melvin Cijntje – Verkeerskundig
Ontwerper/Ministerio di VVRP a bini ku algun bòrchi di tráfiko. Tur mucha a risibí un
sertifikado na final di e lès.
Atentamente,
E Grupo,
Elrick, Ivo, Jeroen, Leon, Melvin i Yves