Importansia di e lei di Deurwaarder

Importansia di e lei di Deurwaarder

 

Na aña 2010 pa falta di un omishon Kòrsou a keda sin un regulashon pa e sektor di Deurwaarder. A konsekuensia di esaki e siudadano no tabatin niun kuadro hurídiko pa tene na dje na momento ku e tin un keho pa ku su kaso di debe. Algun deurwaarder a hasi mal uso di e situashon i a krea nan propio reglanan ku no ta benefisiá e debedor. 

 

Frakshon di PAR despues di kombersashonnan intenso ku e vèlt di deurwaarder i tambe ku siudadanonan a entregá na 2017 e promé vershon di e lei di deurwaarder. I dia 18 di òktober 2019 Parlamento di Kòrsou ku voto general a aprobá e lei aki. 

 

Dikon esaki ta importante:

Awor aki tin un bista ken ta (aspirante) deurwaarder i kua ta su tareanan. Ademas bou di kua kondishonnan e tin mag di ehekutá e tareanan aki. I mas importante ainda tin un instansia ku por kontrolá i si ta nesesario duna sanshon na e deurwaardernan ku ta faya ku lei. 

 

Awor ta na Gobièrnu di Kòrsou pa aprobá i publiká e lei aki. Frakshon di PAR ta spera realmente ku esaki por sosodé promé ku fin di aña 2019. Pa asina Kòrsou pa aña 2020 tin un lei ku ta regulá e sektor di deurwaarder. Frakshon di PAR ta yama danki na un i tur ku a kontribuí na e lei aki, espesialmente sra. Minister Alcala Walle ku a duna inisio na e trayekto pa yega na e lei.  I frakshon di PAR ya kaba a inisiá e trayekto pa diferente otro lei ku lo ta na benefisio general.

 

Ana Maria Pauletta