GRAN APERTURA DI LIGA MCB PROMÉ I SEGUNDO DIVISHON 2019-2020! VICTORY BOYS LO TOPA UNDEBA DJADUMINGU 10 DI NOVÈMBER, 6’OR DI ATARDI DEN SDK!
GRAN APERTURA DI LIGA MCB PROMÉ I SEGUNDO DIVISHON 2019-2020!
VICTORY BOYS LO TOPA UNDEBA DJADUMINGU 10 DI NOVÈMBER,
6’OR DI ATARDI DEN SDK!
Despues di un tremendo Kampionato aña pasa, FFK i MCB ta anunsiá e gran apertura di Liga MCB Promé Divishon ku lo tuma lugá djadumingu, 10 di novèmber próksimo den Stadion Ergilio Hato pa 6’or di atardi.
E dos ekiponan ku lo mira akshon den e gran apertura di Liga MCB Promé Divishon ta Undeba i Victory Boys. Entrada pa e partido aki ta 6 florin i tur mucha bou di 12 aña kompañá pa nan mayor por drenta grátis miéntras 60+ ta paga solamente fl.2.50.
E aña aki Liga MCB ta wòrdu dediká na e siguiente baluartenan; Sr. Angel Ramirez (èks dirigente), Sr. Eric ‘Papa’ Girigoria (èks rèfri), Sr. Ramon Stomp (èks hungadó), Sr. Virgilio Silië (eks hungadó), i Sr. Arto Leito (èks hungadó). E pèrsonanan aki ta tin un kontribushon enorme na e desaroyo di e deporte rei, futbòl. P’esei nan lo wòrdu homenahiá i FFK lo dediká e kampionato di e aña aki na nan.
E partidonan di Liga MCB Promé Divishon lo tuma lugá den Stadion Antoine Maduro (SUBT) i tambe den Stadion Ergilio Hato (SDK). Mayoria wega ta wòrdu hungá den wikènt esta, djabièrnè, djasabra i djadumingu pero lo bai tin tambe algun partido ku lo kai den siman i tur e weganan lo wòrdu dirigí pa árbitronan afiliá na FFK.
Preis pa kampionato regular ta 6 florin pa adulto miéntras 60+ i mucha di 6 te ku 12 aña ta kosta fl.2.50.
E ekiponan ku lo partisipá na Liga MCB Promé Divishon ta lo siguiente:
- Undeba
- Jong Holland
- Centro Barber
- Vesta
- Hubentut Fortuna
- Subt
- Scherpenheuvel
- Centro Dominguito
- Inter Willemstad
- Victory Boys
Liga MCB Segundo Divishon ta inisiá djaluna dia 11 novèmber 2019 ku 2 partido na tereno di FFK. E promé enkuentro lo ta entre New Song i Deportivo Sta. Rosa pa 7’or di anochi i mas despues pa 9’or di anochi FC Sithoc lo enfrentá FC Inter e ekipo kampion di Liga MCB Terser Divishon 18-19 ku a promové pa Liga MCB Segundo Divishon.
Entrada pa e partidonan aki ta kosta fl.3,- general miéntras 60+ ku mucha di 6 te ku di 12 aña ta paga solamente fl.2.50.
E partidonan di Liga MCB Segundo Divishon lo tuma lugá den diferente stadion ku lo wòrdu anunsiá despues. E partidonan lo ta den siman i nan tambe ta wòrdu dirigí pa árbitronan afiliá na FFK.
E ekiponan ku lo partisipá na Liga MCB Segundo Divishon:
- New Song
- SV Inter
- Indekor
- U.D. Tera Kòrá
- Mahuma
- Willemstad
- Jong Colombia
- Atomic
- FC Sithoc
- Deportivo Santa Rosa
Liga MCB Promé i Segundo Divishon lo wòrdu hunga di e siguiente manera:
E promé fase lo konsistí di dos buèlta regular den kua kada ekipo ta enfrentá otro na dos okashon ku un total di 90 wega. Den e segundo fase, e promé 6 ekiponan di e kampionato regular ta enfrentá otro na un okashon ku ta un total di 15 wega. Despues ta sigui e terser fase ku un buèlta di e promé kuater ekiponan di e ‘play off’ di 6 klup.
Den e ‘play off’ di 4 klup e klupnan ta enfrentá otro na un okashon ku ta un total di 6 wega.
Den e último fase di ‘play off ‘ di 4 klup, e dos promé ekiponan ta klasifiká pa e wega final di e kampionato pa mira kua ekipo ta titulá kampion di Liga MCB Promé i Segundo Divishon.
Skema Liga MCB Promé Divishon
| Fecha | Ora | Tim di kas | Bishitante | Stadion | |
| 10 nov. 19 | 18.00 | UNDEBA | vs | VICTORY BOYS | SDK |
| 15 nov.19 | 20.00 | J.HOLLAND | vs | WILLEMSTAD | SUBT |
| 16 nov.. 19 | 19.00 | CSD BARBER | vs | C. DOMINGUTO | SUBT |
| 21.00 | VESTA | vs | SCHERPENHEUVEL | SUBT | |
| 20 nov. 19 | 20.00 | HUB. FORTUNA | vs | SUBT | SUBT |
Skema Liga MCB Segundo Divishon
| Fecha | Ora | Tim di kas | Bishitante | Stadion | |
| 11 nov.19 | 19.00 | NEW SONG | vs | DEP. STA ROSA | – |
| 21.00 | SV INTER | vs | FC SITHOC | – | |
| 13 nov.19 | 19.00 | INDEKOR | vs | ATOMIC | – |
| 21.00 | U.D. TERA KORA | vs | JONG COLOMBIA | – | |
| 19.30 | C.H. MAHUMA | vs | WILLEMSTAD | – |
*Stadion lo wòrdu anunsiá despues
Liga MCB Promé ku Segundo Divishon ta ranka sali den gran forma!
Undeba representando e pueblo di Banda Bou ta bin tur ku tin pa Victory Boys ku tambe ke bai saka kara di Banda Riba! Ta un tabla lo bula den Stadion Ergilio Hato, djadumingu 10 di novèmber próksimo.
Djaluna 11 di novèmber kos ta sigui kayente ku e gran inisio di Liga MCB Segundo Divishon, ku 2 partido sumamente interesante na tereno di FFK.
Pueblo di Kòrsou ta keda kordialmente invitá pa bin na bòshi, bin apoyá bo ekipo preferí i disfrutá ku bo famia di e deporte rei, futbòl!
skema 1e divishon 2019 10 NOV.19
