Apertura proyekto ‘Kunukito den Kas di Kuido’.

Apertura proyekto ‘Kunukito den Kas di Kuido’.

 

WILLEMSTAD- Minister di Salú, Medioambiente i Naturalesa, Sra. Suzy Camelia-Römer ta inkluí grandi i chikí, sin importá nan limitashon den e proyektonan di ‘kunukito’. ‘Kunukito den kas di Kuido’ ta siguí ‘Kunukito den famia i bario’ i tambe ‘Kunukito di skol’ i ta enfoká riba salú físiko i mental di e habitantenan den kasnan di kuido. Den e fin di siman tras di lomba a duna apertura na dos proyekto di ‘Kunukito den Kas di Kuido’ . A start na ‘Sentro Speransa’ ku ta un kas di rehabilitashon di FMA i tambe na e kas di kuido, ‘Betesda’. E meta prinsipal di Kunukito den e instansianan aki ta, pa habitantenan kosechá e benefisionan ku kontakto ku naturalesa di forma struktural ta trese kuné. Benefisionan manera alimentashon sano i nutritivo, redusí depreshon, ansiedat i stress, redusí preokupashon, oumentá kombibensia entre klientenan, relahá mente, oumentá sintimentu di propósito, oumentá sintimentu di supervishon, oumentá sintimentu di satisfakshon. Huntu ku e instansianan menshoná a yega na un trayekto ku ta aplikabel pa kada kas, kaminda lo kombiná aktividatnan di nutrishon sano i kulinario, kreativo i di produkshon di fruta i berdura orgániko. Durante e apertura na Betèsda e habitantenan a duna diferente presentashon riba nos yerbanan i nan uso, huntu ku staf i personal ku tambe a brasa ‘Kunukito den Kas di Kuido’. Keda pendiente pa e próksimo apertura di ‘Kunukito den Kas di Kuido’ Dia: 22 di novèmber 2019 na Habaai 10.00am.