Diploma di Corporate Governance pa komisarionan

Diploma di Corporate Governance pa komisarionan

Geplaatst op 19 November 2019 dor di Ministerio Asuntunan General i Promé Minister

WILLEMSTAD – Djabièrnè 15 di novèmber un grupo total di 45 komisario, gerente, miembronan di direktiva i miembronan di Konseho di Supervishon a risibí nan diploma despues di a kompletá un kantidat di 6 seshon di estudio tokante ehekushon di Lei i Kódigo di Corporate Governance. E seremonia ofisial a tuma lugá durante Dia di Komisario na La Belle Alliance, Avila Beach Hotel, kaminda Promé Minister Rhuggenaath i Minister Gijsbertha di Finansia a hiba algun palabra i hasi entregá di e diplomanan.

E seshonnan di estudio, kaminda e promé seshon a start na Novèmber 2018, a tuma lugá ku e ophetivo pa haña e oportunidat pa amplia konosementu, mehorá abilidat i kompartí demas informashon ku otro tokante ehekushon di Lei di Corporate Governance i e Kódigo di Corporate Governance. Themis Institute for Corporate Governance den koperashon ku e Grupo di Trabou pa rekrutá Komisario di Pais Kòrsou, ta e instituto ku a fasilitá kompletamente grátis e seshonnan práktiko i interaktivo aki, ku aporte di ekspertonan prof. dr. Kunneman i drs. Ing. Kroon. Alabes por a konta riba un kontribushon balioso di diferente otro persona ku konosementu amplio di e materia. Tópikonan ku entre otro a bin dilanti durante e seshonnan ta e diferente aspektonan di maneho relatá na bon gobernashon, manera integridat, transparensia i un sentido haltu di responsabilidat. Tambe a para ketu na aspektonan hurídiko i organisatorio di manehá un Komisariado.

Intenshon ta pa a largo plaso kontinuá e seshonnan aki i asina sigui halsa kalidat di e forma ku komisarionan ta ehekutá nan trabou pa vários fundashon di Gobièrnu i entidatnan aliá na e aparato gubernamental. Pa mas informashon por tuma kontakto ku sr. Rudy Eleonora, presidente di e Grupo di Trabou pa rekrutá Komisario di Pais Kòrsou, na number di telefòn 434-6032 / 520-3751 òf pa medio di e-mail rudy.eleonora@gmail.com.

        

        

 

This site uses Akismet to reduce spam. Learn how your comment data is processed.

error: Content is protected !!
%d bloggers like this: