HOPI INTERES PA KURSO DI HISTORIA DI MUZIK DI KORSOU ORGANISA PA CCC

HOPI INTERES PA KURSO DI HISTORIA DI MUZIK DI KORSOU ORGANISA PA CCC

 

Durante e periodo 4 di febrüari pa 6 di mei 2019 Sentro Kultural Kòrsou a organisá otro éksitoso Kurso di Historia di Muzik di Kòrsou. E kurso aki tabata na enkargo di e konosido músiko Henri (Harry) Moen i keda tené den e fasilidatnan di Sentro Kultural Kòrsou situá na Emmastad. Den e kurso aki ta trata desaroyo di muzik tradishonal di Kòrsou entre 1863 i 2000 tambe aspektonan sosial i ekonómiko ku tin relashon ku e desaroyo.  Ademas e kursantenan ta siña konosé ritmonan tradishonal i konhuntonan di ántes, tambe nan ta siña konosé kompositornan i otro desaroyo den muzik ku Kòrsou a konosé.

 

Mester bisa ku tabatin hopi interes pa e kurso, i meskos ku otro biahanan, e tabata un èksito total. Na opinion di e kursantenan e kurso aki a yena un bashí na informashon tokante nos muzik serka nan. E forma úniko di duna lès di Harry Moen i su splikashon al kaso, kla i konsiso a mantené un entusiasmo kontínuo serka tur e kursantenan. 

 

Komo klousura di e kurso, kursantenan a risibí nan sertifikado for di man di señor Harry Moen i señor Frank Hanze, miembro di Direktiva di Fundashon Sentro Kultural Kòrsou.

Esnan ku a kualifiká pa nan sertifikado ta : Mercedes Campagnard-de Windt, Antonius J.M. Halman, Roberto de Lannoy, June Leonora, Enid Malon, Erich Martina, Renaldo do Rego, Nidia Rosaria-Wallé, Raymond S. Scherptong i Creselsa Sintiago.

 

Sentro Kultural Kòrsou ta felisitá tur e partisipantenan i nan dosente ku èksito di e kurso.

For di aña 2012 un total di 143 kursante a partisipá na e kurso aki di kua 67 penshonado a risibí nan sertifikado di partisipashon na e kurso.

This site uses Akismet to reduce spam. Learn how your comment data is processed.

error: Content is protected !!
%d bloggers like this: