SOFA proksimamente lo ta válido pa Kòrsou tambe
SOFA proksimamente lo ta válido pa Kòrsou tambe
Djamars último parlamentario Ana Maria Pauletta a representá Parlamento di Kòrsou durante tratamentu di e tratado di Status of Forces Agreement (SOFA) den Tweede Kamer na Hulanda.
E tratado ta regla spesífikamente e posibilidat pa militarnan merikano train i duna asistensia durante desasternan natural riba teritorio di Kòrsou. SOFA a kuminsá na aña 2005 i te ku aña 2012 Kòrsou a forma parti di esaki. Na aña 2018 Kòrsou a hasi e petishon pa atrobe partisipá den e tratado aki.
SOFA ta trese benefisiosonan ekonómiko pa pais Kòrsou. Mirando barku i tripulashon militar ku hasi e petishon pa para na Kòrsou lo por hasi uso di nos fasilidatnan pa train. Komo Kòrsou tin diferente fasilidat pa hasi training, por ehèmpel pa sambuyá, den pasado e tabata keda usa hopi, lokual tabata generá entrada pa Kòrsou. Esaki ta un forma mas pa diversifiká e entrada nan di divisa pa pais. Ademas ku e tratado aki ta krea tambe e posibilidat pa yudansa den kasonan di desasternan natural. Durante último 6 añanan Kòrsou no por a fungi komo teritorio pa training, pa motibu ku nos no tabata parti di e tratado aki.
Komo SOFA ta keda aprobá por medio di un lei di Reino, Kòrsou por a manda un delegado spesial pa partisipá na e debate. Parlamentario Pauletta, presidente di e komishon di Reino di Parlamento di Kòrsou i ku a vigilá e tratamentu di e lei aki for di su komienso, riba mandato di Parlamento di Kòrsou, a representá Kòrsou i partisipá na e debate den Tweede Kamer. Durante di e debate por a tuma nota ku partido SP tabatin un mal interpretashon di e lei, den kual a krea e idea ku e tratado di un òf otro forma lo por fasilitá intervenshonnan militar den paisnan bisiña. Pero parlamentario Pauletta por a aklará esaki i Minister di Asuntunan di Eksterior di Reino sr. Stef Blok tambe a ratifiká ku e tratado SOFA no ta regla di niun forma intervenshon i/òf akshon militar.
Otro siman Tweede Kamer lo vota riba e lei di aprobashon SOFA i basá riba e disertashon di sra. Pauletta, nos por ta konvensí ku Tweede Kamer lo vota na fabor di e lei aki i Kòrsou proksimamente lo forma parti di e tratado di SOFA, manera tur otro pais den Reino.
___________________________________________________________
Ana Maria Pauletta