Elsa Rozendal di MAN: Ainda nò tin solushon pa kongestion di tráfiko riba Caracasbaaiweg i otro kareteranan.

Elsa Rozendal di MAN: Ainda nò tin solushon pa kongestion di tráfiko riba Caracasbaaiweg i otro kareteranan.

Outomobilistanan ta pidi ousilio pa kongestion di tráfiko tur mainta i atardi riba nos kareteranan. Esaki ta trese hopi inkomodidat i frustrashon serka e outmobilistanan aki. Ta hopi tempu balioso nan ta pèrde pegá den tráfiko tur mainta ora nan ta akudí na nan trabou i/òf hiba muchanan skol i atardi ora nan regresa nan kas bèk.

Pa e motibu aki, Parlamentario Rozendal a manda varios karta pa Minister di Tráfiko, Transporte i Planifikashon Urbano fechá, 19 desèmber 2016 i un karta di rapèl fechá 15 novèmber 2017. Riba e último e parlamentario a risibí kontesta riba 6 di aprel 2018 den kual e minister ta indiká posibel solushonnan i ku lo a implementá esakinan den 2018. Rozendal ta konstatá sin embargo ku e problemátiko di kongestion di tráfiko a keda sin solushon, espesialmente riba Caracasbaaiweg. Hopi ta e usuarionan ku den pasado i aktualmente a aserká e Parlamentairo pa pidi ousilio.

Pa e motibu aki, e Parlamentario a bolbe manda karta pa e minister den kual e ta hasi apelashon un biaha mas pa e minister atendé ku e situashon di kongestion di tráfiko riba nos kareteranan i tambe a hasi pregunta riba esaki durante tratamentu di Presupuesto. Rozendal ta di opinion ku si duna e problemátika aki e atenshon nesesario, nos mester por yega na solushonnan duradero.