OW a konkretisá diferente proyekto di drecha kaya den un temporada relativamente kòrtiku
OW a konkretisá diferente proyekto di drecha kaya den un temporada relativamente kòrtiku
Geplaatst op 16 December 2019 dor di Ministerio Tráfiko, Transporte i Planifikashon Urbano
Willemstad – Un bon infrastruktura ta kontribuí na alsa seguridat den tráfiko, ta hasi e mobilidat mas efektivo, i por alsa nos nivel di bida. Ku e aspekto aki den mente, Minister Jesus-Leito huntu ku Servisio di Obra Públiko (OW), i un kantidat grandi di kontratista, a kuminsá ku diferente proyekto riba kaya resientemente. E proyektonan tabata konsistí di entre otro konstruí drèmpel i krusadanan elevá, i drecha diferente kaya. Huntu a logra konkretisá diferente proyekto di drecha kaya den un temporada relativamente kòrtiku.
A logra finalisá diferente di e proyektonan miéntras ku algun otro, manera a anunsiá anteriormente, lo sigui ku nan den 2020. Proyektonan grandi ku a kuminsá kuné i lo tin nan kulminashon na luna di febrüari otro aña ta:
- drechamentu di kayanan den e bario di Soaux,
- e turnaround na Knip, i
- Esmeraldaweg di kual e promé fase ta parsialmente kla.
Pa loke ta drèmpel i krusadanan elevá na Admiraalsweg/Kolonelsweg, Tortolaweg, Kaya Ser’i Milon, kaminda Palomba i Balashiweg, esakinan ta kompletamente kla. Krusadanan elevá i drèmpelnan riba Kaya Abrahams no a keda kla ainda. Tambe a konkretisá e drechamentu di kaya den Salinja, Bramendiweg, Granbeuweg, Jan Kok, Hanchi Buriku, Dokterstuin, Wacawa i Lelienberg.
Djabièrnè 13 desèmber 2019 e periodo di vakashon pa kontratistanan a kuminsa i por mira atras ku satisfakshon kon e trabounan a avansá. Kontratistanan ta reanudá trabou medio yanüari 2020 i lo sigui mesora ku e trabounan ku a keda pendiente.
Minister Jesus-Leito i OW ta bastante satisfecho kon e trabounan a kana i ta gradisí komunidat p’e koperashon i aseptashon risibí.