Akuerdo entre RdK i Grupo Klesch ta un paso grandi mas den garantisá futuro di nos refineria

Akuerdo entre RdK i Grupo Klesch ta un paso grandi mas den garantisá futuro di nos refineria

Geplaatst op 23 December 2019 dor di Ministerio Asuntunan General i Promé Minister

WILLEMSTAD – Refineria di Kòrsou (RdK) i Grupo Klesch a firma djadumingu 22 di desèmber un akuerdo inisial pa loke ta trata operashon di nos refineria. Esaki den forma di un asina yamá “Asset Purchase and Sale Agreement” (APSA) i un akuerdo riba transferensha di erfpacht di terenonan i opstalrecht, ku ta garantisá un futuro duradero di nos fasilidatnan petrolero. Gobièrnu di Kòrsou ta konsiderá e mia aki un logro di gran importansia i signifikashon pa progreso i bienestar di Kòrsou. E  ta parti di un proseso ekstenso i intensivo, ku a kana bon delineá i di un forma stratégiko i ku awor mester kaba di finalisá.

E akuerdo den forma di un ‘long lease agreement’ di 60 aña ku a sera,  ta unu ku ta kumbiní tantu RdK komo Grupo Klesch, i alabes lo trese vários benefisio pa komunidat di Kòrsou. Ta transferí e instalashonnan den  nan  kondishon aktual, ku e garantia  ku Grupo Klesch ta hasi invershonnan supstansial i kuantioso den e ekipo i tur otro fasilidatnan. Asina komunidat den futuro por benefisiá  di un operashon mas moderno i efisiente di nos refineria, terminal di Bullenbaai i Curaçao Refinery Utility (CRU), pero tambe saka benefisio riba tereno finansiero. Primeramente Grupo Klesch lo bai paga 15 mion dòler pa aña di erfpacht i lo subi esaki ku e tasa di inflashon te na un máksimo di 2%. Banda di esei ta bai saka mas for di e potensial di Bullenbaai tambe atraves di un asina yamá ‘throughput fee’. Esaki ta un montante ku Grupo Klesch ta paga pa kada barí ku ta drenta den tránsito of pa almasenahe, ku por monta alrededor di 13 mion dòler pa aña mas e kosto di inflashon. Esaki ta promé bes den nos historia petrolero ku Refineria di Kòrsou lo bai kobra un montante pa barí. Esaki a lo largu ta trese entradanan pa nos pais ku lo benefisiá un kantidat grandi di industria i sektornan pa añanan benidero.

Tambe a negoshá ku Refineria di Kòrsou ta bai haña un kantidat di tereno bèk, en total mas ku un kuart (29%) di e tereno total, pa asina atraé mas invershon, desaroyá aktividatnan i industrianan nobo i duradero ku lo generá ainda mas trabou i invershon.  Esaki ta inkluí parti di Bullenbaai ku por bai diversifiká. Basá riba e echo ku ta trata di un invershon sumamente kuantioso di Grupo Klesch durante añanan benidero pa instalashonnan ku tin un estado di mantenshon atrasá, i tambe e diferente fuentenan di entrada nobo, e traspaso formal ta tuma lugá a base di un preis simbóliko di 1 dòler. Echo ta ku e invershonnan i aktividatnan nobo lo nifiká mas komèrsio, mas kupo di trabou i pues mas entrada pa nos hendenan. Naturalmente tin kondishonnan mará na e uzo di e terenonan i semper Refineria di Kòrsou lo tin e promé opshon di kumpra e instalashonnan bèk.

Gobièrnu di Kòrsou ta mira e desaroyonan ku mester bai tuma lugá awor ku gran antisipashon i ta pará kla pa sigui asistí PMO. Tantu RdK komo Grupo Klesch mester bai kumpli ku algun kondishon pa por yega na entendimentunan final i asina firma dos akuerdo mas ku falta, esta un ‘Transfer deed’ (ku ta kompletá kaba) i un ‘Government agreement’. Ademas RdK lo tuma e pasonan nesesario pa realisá tantu transishon harmonioso di e fasilidatnan petrolero komo desaroyo di e plan empresarial pa desaroyá potenshal aktividatnan ekonómiko nobo riba terenonan ku a bin liber. Durante e fase aki Gobièrnu ta sigui duna tur di su banda na bienestar di pueblo di Kòrsou i lo tene komunidat debidamente informá di esaki.

 

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: