Koperashon di públiko i prensa na sitio di insidente.

KOMUNIKADO DI PRENSA
022 / 2020
17 yanüari 2020
Koperashon di públiko i prensa na sitio di insidente.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Kuerpo Polisial un bia mas ta pidi komunidat i medionan di komunikashon koperashon pa lo
siguiente.
Último tempu ta pasa ku sierto frekuensia ku públiko, pero tambe miembronan di prensa
no ta tene nan mes na instrukshonnan ku polis ta duna na momentu ku tin un sitio di
krímen òf un área ku polis ta sera pa investigá un insidente ku a tuma lugá.
Ta bon pa splika, ku niun momentu so, no ta intenshon di polis, pa stroba ningun medio di
komunikashon pa hasi nan trabou. Kontrario. Polis ta kere ku ta ku huntu ku komunidat den
su totalidat, inkluso prensa, mester kombatí krímen riba nos isla.
Sinembargo, ta hopi importante pa na momentu ku un krímen òf un insidente tuma lugá, pa
hasi e investigashon nesesario, pa establesé e.o.:
– Kiko ta loke realmente a sosodé;
– Kon el a sosodé;
– Dikon el a sosodé;
– Ken ta esun(nan) responsabel pa loke ku a sosodé.
Banda di e trabou di investigashon aki ku mester keda realisá, polis tin un trabou tambe di
sòru pa seguridat di tur siudadano.
Inkluso e públiko ku ta bini pa tuma nota di loke a pasa i e representantenan di prensa, ku
tin e trabou di informá komunidat di loke ku a akontesé.
Hopi bia, na momentu ku polis yega, ya kaba tin personanan den besindario ku ta na e sitio
kaba òf miembronan di prensa ku a yega promé.
Polis, pa por kuminsá ku e trabounan, sea su so òf huntu ku otro instansianan, ta saka tur
hende for di e área i ta sera un área determiná, ku barí, sinta i/o vehíkulo polisial pa
trabounan por kuminsá.
Den kaso ku ta riba kaminda públiko, si ta nesesario, ta asta desviá e tráfiko pa e trabou por
tuma lugá den tur trankilidat.
Bou di ningun sirkunstansia, na momentu ku polis marka e teritorio di investigashon, ningun
persona por subi e área aki mas, sin outorisashon di esun ku na e momentu ei tin guia i
supervishon riba e sitio ei.
Ta notabel ku durante di algun kaso ku tabatin últimamente, siudadanonan ta burla di
instrukshon ku polis ta duna, pa no subi e sitio di insidente.
Ta bon pa un i tur sa, ku na momentu ku un siudadano no kumpli ku un instrukshon i/o òrdu
duná dor di polis inmediatamente, konforme lei e por wòrdu detené.
Polis ke sigui mantené un bon relashon ku prensa i ku komunidat. Lamentablemente, no ta
tur bia e trabou ku polis ta ehersé, por komplasé òf satisfasé deseo di tur siudadano òf
personanan ku ta presta nan labor, manera mester ta.
Pasobra polis mester wak un interes mas grandi i sigur duna prioridat i importansia na loke
ku na e momentu ei urgentemente ta rekerí esei.
P’esei Kuerpo Polisial ta spera koperashon di komunidat i di prensa pa den tur trankilidat e
hasi su trabou, na interes di e mesun komunidat ku e tei pa sirbi i protehá.