Rotònde na Brievengat meresé un “face lifting” pa duna e rotònde e realse ku e meresé, debí ku ta riba e rotònde aki ta eksponé bandera di diferente pais ora Kòrsou ta organisá kompetensia internashonal

Rotònde na Brievengat meresé un “face lifting” pa duna e rotònde e realse ku e meresé, debí ku ta riba e rotònde aki ta eksponé bandera di diferente pais ora Kòrsou ta organisá kompetensia internashonal

 

Bandera di un pais ta e eskudo máksimo di un pais i ta e símbolo ku ta representá kada pais. Bandera di kada pais tin un nifikashon i esaki ta bon deskribí pa kada pais kon bin nan a yega na diseño di nan bandera.

 

Na momentu ku ta toka i/òf kanta himno di un pais, kasi semper ta hasi esaki mirando den direkshon di e bandera di e pais konserní. Esaki komo muestra di rèspèt pa e pais. Meskos tin reglanan ku ta indiká kua ta e orarionan ku un bandera por wòrdu hisá i baha.

 

Na aña 2017 ora Kòrsou a organisá Carifta Games, a laga traha riba e rotònde na Brievengat un sirkulo di aluminio, kaminda a pone bandera di e diferente pais nan ku a partisipá den e Carifta Games. Esaki a resultá den un bista sumamente bunita i impreshonante.

 

E struktura aki a wòrdu usa na mas okashon pa pone banderanan di otro pais i tambe ora tabatin otro enkuentronan internashonal. Na mi humilde opinion nos mester duna e rotònde aki un realse kompará ku e forma ku e ta aktualmente. Nos por mira ku tin hopi yerba ta krese riba e rotònde dunando un bista hopi mahos.

 

Ta p’esei nos kier urgi Minister Zita Jesus-Leito pa medio di su departamentonan pa laga pone “baksteen” òf kualkier otro tipo di material riba e rotònde i tambe planta mata pa por duna e rotònde un bista muchu mas bunita. Traha riba un iluminashon mas moderno ku por tin efekto riba e banderanan

 

Nos no mester lubidá ku e rotònde aki ta den porta di nos estado nashonal Ergilio Hato, ora deportistanan di afó bin pa hasi deporte den nos stadion nashonal tur mester pasa via di e rotònde aki pa por yega na nos stadion.

 

Suskrito ta spera ku minister Zita Jesus-Leito lo aktua di forma rápido pa duna e rotònde aki e bista bunita ku e meresé.

 

Gilbert Doran

Miembro di Parlamento

pa Frakshon di MFK

This site uses Akismet to reduce spam. Learn how your comment data is processed.

error: Content is protected !!
%d bloggers like this: