Don Andres ta reklama subida di preis di parti CPA

[BON NEWS] – E kompania lokal Don Andres pa mas ku 30 aña ta brinda su servisio di transporte ku barku di tur merkansia, produkto, material i otronan entre e islanan di èks Antia i pa Boneiru prinsipalmente.

Loke a sosodé na fin di yanüari 2020 ta algu insólito, na momentu ku e kompania a haña fakturanan adishonal di loke nan a haña kaba pa paga i ku ta indiká tarifanan astronómiko.
Esaki a pone ku e kompania Don Andres a aserká Curaçao Port Services ku e petishon pa kambia e tarifanan bèk i kuminsá un proseso den kua ta anunsiá kambionan na kaminda di manera ku nan, komo kompania di barku na nan turno, por avisá nan klientenan.

Mes momentu Don Andres a pidi CPS pa un kombersashon mirando ku CPS ta subi gastu solamente pa kònteiner i otro material propiedat di Don Andres!
Di e forma aki Don Andres ke informá komunidat ku debidamente a tuma lugá un oumentu drástiko di tarifanan di parti di CPS, no ta trata di ‘fake news’!

Don Andres komo e úniko kompania di barku ku a keda, ku ta hasi transporte entre e islanan di èks Antia tin un akuerdo ku CPS ku nan ta paga un suma fiho sea nan tin un kònteiner so riba nan barku òf nan tin e kantidat máksimo ku nan barkunan por karga.

Mester paga CPS e suma ei pa subi kònteinernan riba e barku i e mesun suma pa baha kònteiner for di barku.
Un ehèmpel di práktika ta ku mester paga CPS un suma di Fl 175 pa kada kònteiner di 20 pia ku bai i bini bèk. E preis nobo ku e kompania a haña riba nan faktura na fin di yanüari ta Fl 1480,-pues di Fl 175 pa Fl 1480. Pa un kònteiner di 40 pia e suma tabata Fl 350,- i na fin di yanüari di forma sorpresivo e suma a bira Fl 2350,-.

E loke ta mas notabel den e kaso aki ta ku e oumentu ku CPS ke imponé mester konta solamente pa tur kònteiner i otro ekipo ku ta propiedat di Don Andres. Kònteiner di otro kompanianan te ainda no ta haña e oumentu drástiko menshoná. E oumentu aki a bini di forma sorpresivo pa motibu ku niun momentu CPS no a informá adelantá ku por spera tal oumentu.

Don Andres komo kompania lokal ta konsiente ku den tempu di e Asosiashon di Industrialistanan Antiano (ASINA) a yega na un tarifa speshal pa transporte di karga ku barku entre e islanan pa asina tene e gastunan mas abou i asina duna e fábrikanan lokal chèns di progresá. Ta komprendibel si sea CPS ke adaptá e tarifanan òf hasta eliminá e tarifa ASINA, pero sin aviso delantá esei solamente ta kousa hopi konsternashon den ekonomia na Korsou i Boneiru.

Si Don Andres no reklamá e oumentu astronómiko aki esei lo nifiká ku komersio boneriano lo konfrontá oumentunan bárbaro di gòlpi i ku seguridat lo buska otro alternativa na lugá di Kòrsou.

Banda di esei kompanianan na Kòrsou ku ya kaba tin difikultat pa drai lo mira nan benta bai mas atras. Ban traha pa progreso di nos islanan.