Bishita di Atlanta Metro RBI ketu bai dunando fruta CBDF a risibí kantidat di material di donashon kortesia di Mizuno i Atlanta Braves

Bishita di Atlanta Metro RBI ketu bai dunando fruta

CBDF a risibí kantidat di material di donashon kortesia di Mizuno i Atlanta Braves

 

WILLEMSTAD – Curaçao Baseball Development Foundation (CBDF) ta sumamente orguyoso ku e konfiansa di parti e prestigioso kompania multinashonal, Mizuno. Relashoná ku e eksitoso bishita di  Atlanta Metro RBI na Kòrsou na yanüari último, un kantidat grandi di material a keda manda pa CBDF. E material ta un opsekio di Mizuno i Atlanta Braves a paga pa e gastu di transporte te Miami. CBDF a kubri sobra gastunan di transporte pa Kòrsou. E donashon tabata konsistí di entre otro hopi wante, hopi sapatu, kasko,  kamiseta i 200 faha na balor di mas ku 50 mil doler. Tur e materialnan aki lo keda repartí pa e organisashonnan ku a partisipá den kampionato di RBI 2019. Aparte di esaki, Atlanta Metro RBI a hasi e petishon spesífiko pa hasi un donashon tambe na e organisashon di Koraalspecht. Esaki pa motibu ku nan a keda ku un sentimentu emoshonal despues di e bishita e parke aki pa sera konosí unda Ozzie Albies a train den su hubentut i te awor aki. Manera ta konosí, Ozzie Albies a kore keiru ku e ekipo di Altanta den Koraalspecht i bishita su kas tambe. Siman pasa tur material a yega Kòrsou i mesora e fin di siman tras d lomba representantenan di CBDF a sorprendé e organisashon di Koraalspecht ku e donashon ku a toka pa nan despues di nan wega na Sabana Ballpark. Tantu dirigèntnan, coachnan i hungadónan a keda sumamente kontentu ku e donashon. Tur e hóbennan ku a forma parti di e selekshon di RBI U16 ku a hunga kontra di Atlanta Metro RBI a risibí un kasko i ta pendiente pa risibí un wante i sapatu. Den proksimá dianan mas organisashon lo risibí e material ku ta toka nan. “CBDF su meta prinsipal ta pa yuda ku desaroyo di baseball aki na Kòrsou i ta orguyoso di e konfiansa ku tantu MLB, MLBPA, KNBSB, MCB, Curacao Baseball Week, CTDB i awor tambe Mizuno i Atlanta Braves ta pone den nos.” Despues di e eksitoso kampionato di RBI na final di 2019 i tambe MLB Elite Program, a sirbi komo anfitrion di e interkambio deportivo/kultural di Atlanta Metro RBI. Tambe ya a hasi vários donashon kaba na yanüari pa entre otro Torneo FABB, bònt di softball di dama, beisbòl di dama i awor pa Koraalspecht. Manera a indiká kaba lo tin mas donashon na kaminda i ya preparashon a kuminsá pa selekshon di RBI biaha pa Vero Beach pa kompetensia regional i tambe pa reinisio di MLB Elite Program.

    

This site uses Akismet to reduce spam. Learn how your comment data is processed.

error: Content is protected !!
%d bloggers like this: