Bisti e T-shirt, saka portrèt den Gran Marcha i gana! Social Bizz-Buzz ta rifa fl250 bou di hende para kant’i kaya

Bisti e T-shirt, saka portrèt den Gran Marcha i gana!  

Social Bizz-Buzz ta rifa fl250 bou di hende para kant’i kaya

WILLEMSTAD – Buzz bo Karnaval 50 ku e T-shirtnan bèrde-bèrde di Social Bizz-Buzz. Djis bisti e T-shirt kant’i kaya den Gran Marcha, saka un selfie i post e riba e página di Facebook di Social Bizz-Buzz. E portrèt ku riba djarason di Shinishi (26 di febrüari) pa 2 or di atardi tin mas tantu likes ta gana e fl250. Ta anunsiá e ganadónan riba djaweps 27 di febrüari. 

“Kada persona òf grupo para kant’i kaya por partisipá”, asina Jorge Cuartas, propietario di Social Bizz-Buzz ta bisa. “E úniko kondishon ta, ku tur hende riba e portrèt mester tin e T-shirt bistí i ku mester por mira e diseño parti dilanti di e T-shirt bon-bon riba e portrèt. Djadumingu dia di Gran Marcha nos ta habri nos página di Facebook pa tur hende por post nan portrèt libremente.” 

Entrega di T-shirtnan 

Pa haña e T-shirtnan por pre-order te ku djabièrnè 14 di febrüari 2pm ku un private message riba e pagina di Facebook di Social Bizz-Buzz. Tin ku indiká e kantidatnan deseá i e sizenan. E T-shirtnan ta na benta pa fl. 10. Tin ku paga adelantá i ku e resibu por pasa buska e T-shirtnan djaweps 20 di febrüari entre 11am i 3pm na ofisina di Social Bizz-Buzz (Bitterstraat 5-17), nèt patras di Museo Marítimo den Scharloo. 

Bishitá e Facebook página di Social Bizz-Buzz (www.facebook.com/socialbizzbuzz) òf WhatsApp ku 690 5948 pa mas informashon.