Imani su kaso a bai Korte Komun

Imani su kaso a bai Korte Komun

 

Awe, 6 di febrüari 2020, Korte Komun a trata e kaso di Imani Trinidad. Dia 5 di mart próksimo, mayornan Van Wilgen-Trinidad lo risibí e desishon di Korte.

E mayornan a keda kompañá pa amigu i famia. Tambe diferente mayor ku a pasa den e mesun situashon tabata tei presente na tratamentu di e kaso. Miembro di Parlamento sra. Pauletta tambe a duna su sosten i tabata tei presente.

Durante di e tratamentu di e kaso, ku tabata bastante emoshonal pa tur presente, representashon di Publieke Zaken (Kranshi) a indiká di no tin opheshon pa kambia e nòmber riba e akta di fayesementu. Esaki sigur ta un punto positivo.

E kaso aki, ta e promé kaso kaminda un mayor a pida pa trese kambio riba e akta di ‘nasementu sin bida ‘ di nan yu. Ku e kambio aki ta krea e oportunidat pa no solamente Imani, pero pa tur mayor ku kier pone e nòmber di nan yu riba e akta akta di ‘nasementu sin bida ‘, por  hasi esaki sin tin mester di hasi petishon na Korte. 

Mayornan di Imani kier gradesí tur persona ku riba e dia aki a duna sosten, dor di nan presensia òf un palabra. Pareha Van Wilgen-Trinidad ta indiká ku e kaso aki ta pa tur baby ku a nase sin bida haña nan nòmber. 

Awor ta keda pa warda e sentensia di korte. Pero un kos ta sigur pareha Van Wilgen-Trinidad lo sigui traha riba e tema aki, huntu ku tur mayor. E trayekto di lei pa salbaguardiá tur derechi di e yunan ku nase sin bida tambe mester kana su kaminda den Parlamento di Kòrsou. Ainda tin diferente lei ku mester keda adaptá. Pero ku esaki un promé paso a keda tumá.

This site uses Akismet to reduce spam. Learn how your comment data is processed.

error: Content is protected !!
%d bloggers like this: