Stephen Walroud: Petishon pa un reunion publiko.
Presidente di Parlamento
Sr. W. Millerson
Wilhelminaplein 4
Presente
Djabièrnè, 7 di febrüari 2020
Tópiko: Petishon pa un reunion públiko ku karakter di urgensia ku e punto di agènda; Kambionan den e lei di transporte públiko ku parlamento ke mira ehekutá pa saka e sektor for di e estado di krísis
Apresiable señor Millerson.
Dia 6 di febrüari Parlamento di Kòrsou den un reunion di komishon sentral a deliberá ku Minister di Tráfiko, Transporte i Planifikashon Urbano tokante optimalisashon di nos transporte públiko i tambe kambionan den maneho di transporte di Autobusbedrijf.
Den e reunion aki tur frakshon presente a vosiferá un biaha mas ku nan ke mira kambionan riguroso den nos transporte públiko i ku e minister konserní mester dirigí maneho di e ministerio den e direkshon ei manera parlamento ya den un moshon di 2 di desèmber 2019 a duna na kla.
Pa sigurá ku e kambionan den nos transporte públiko no solamente kana ku e diligensia nesesario pero tambe ku e kambionan ta dirigí i spesífiko, parlamento den un reunion públiko lo ke pasa un moshon mas banda di e moshon di 2 di desèmber 2019. Den e moshon próksimo aki, parlamento lo ta mas spesífiko den direkshon di puntonan den e lei di transporte públiko ku parlamento lo ke mira kambiá. E kambionan lo ta den e direkshon di laga e konotashon sosial rondó di un pèrmit pa por transportá hende kai, pa habri e merkado di taksi i tourwagen i pa ankra e sistema di transporte ku bus den un asina yamá ‘dienstregeling’. Asina nos lo kaba ku entre otro abuso kontra di shafernan ouksiliar i tambe kaba ku hasimentu di negoshi ku pèrmit nan di gobièrnu di Kòrsou.
Mirando ku parlamento a deklará nos transporte públiko den un estado di krísis i e krísis tin ku wòrdu atendé sin pèrdè tempu, nos ta urgi presidente di parlamento pa konvoká ku karakter di urgensia un reunion públiko pa asina parlamento por fiha posishon. E reunion aki lo no dura largu paso e ta mas pa pasa e moshon ya anunsiá. Den e kuadro aki un spreektijd di 5 i 2 minüt ta sufisiente.
Pa e reunion aki nos lo ke mira presensia di minister di Tráfiko, Transporte i Planifikashon Urbano.
Atentamente
- Walroud (PAR) E. Cleopa (MAN) C. Cooper (MFK)
- Cordoba (PS)
