Fundashon Karnaval Banda Bou ta kla pa Marcha Karnaval Banda Bou 2020
Fundashon Karnaval Banda Bou ta kla pa Marcha Karnaval Banda Bou 2020
Djarason mèrdia na Sektor di Kultura i Deporte FKBB i Tim di Transishon a tene un rueda di prensa pa kaba di duna e último informashon nan pa loke ta Marcha di Skol djabièrnè 21 febrüari i Marcha di Banda Bou djasabra 22 febrüari próksimo.
Rignald Maduro di Tim di Transishon a komuniká ku e Marcha di Skol lo kuminsá 9’or ku un total di mas o ménos 700 mucha, e aña aki un poko mas chikí, pero nan ta satisfecho ku e skol nan ku si a keda ku e konfiansa den FKBB pa partisipá. Ta sali for dilanti di kas sra. Vera Djaoen i terminá na Plasa Himno i Bandera.
Huntu ku Kuerpo Polisial, Pasial Dog Security lo sòru pa e órden públiko, den bos di sr. Granviel di Kuerpo Polisial a hasi un yamada pa e komportashon na Banda Bou, pa tene kuenta ku lo sera kayanan for di 8’or di mainta for di Kaya Propero Royer te ku Kaya Johannes Francisco. Ku Kuerpo Polisial lo ta bai ta visibel tantu na komienso komo ora ku e Marcha finalisá for di Barber te na Rotònde di Zegu. E akshon “Aktua robes, Sintié un bes” tambe lo ta na vigor na Banda Bou, lo bai tin dranghek for di Seru Molina te na Final di e Marcha. Lo sera e 3 vianan for di 12’or di mèrdia, pa públiko tene kuenta ku esaki.
Sr. Rayshell Pasial di Pasial Dog Security ta satisfecho ku e komunikashon ku Polis pa asina huntu mantené e órden públiko durante di e Marcha.
Sr. Johny Isabella di Tim di Transishon lo ta enkargá huntu ku Polis pa guia e vehíkulo nan pa Banda bou na Salida di e Marcha. Tur Trèker / Trailer, Dj nan, Bar i Karosa mester ta 12’or enpunto na Daniel, e kaminda bashí despues di Daniel pa asina den órden di nan numerashon kore huntu bai Banda Bou. Lo tin un total di 27 vehíkulo den Marcha. Ta hasi un súplika pa tur hende ta na tempu. A firma ku tur e Dj nan un kontrakt, ku lo ta den marcha pa asina por tin un bon komprendementu pa ku e Karnaval di Banda Bou 2020.
Djasabra durante di e Marcha di Banda Bou lo tin e posibilidat pa sa “Unda e kabes ta” trese dor di sr. Nathaniel Zoetrum di Ictual i nan partnernan. Esaki ta un regalo na FKBB. E app aki por wòrdu di download riba boso telefon via di Google App of App Store. E la resultá hopi positivo djadumingu último di Marcha Hubenil 2020. Nan a risibí hopi bon feedback.
Presente na e rueda di prensa tabata tei Rei di Tumba 2020, Ray Lauffer ku a bisa di ta sumamente kontentu di por tei na Banda Bou, e lo drenta den e marcha na Seru Molina te na final i lo wòrdu kompaña pa Excellence Band. Reina di Karnaval di Banda Bou i Promé Finalista Reina Karnaval 2020, Nissah Libiee tambe a presentá i bisa ku pe ta un honor i danki pa e aseptashon di parti di e pueblo di Banda Bou i di Kòrsou. Nissah tambe lo ta riba Karosa huntu ku Reina Karnaval 2020 i Reina Willemstad 2020. Huntu ku tur e otro embahadornan di Karnaval Kòrsou 2020. Lo tin un total di 12 grupo di kual 4 ta di Banda Bou i dos individual, ku lo wòrdu kompaña pa algun Dj i Excellence Band.
Autobusbedrijf Curaçao ta hasi un súplika pa tuma nota di algun kambio pa loke ta orarionan dia di Marcha Karnaval Banda Bou, por haña esaki riba nan página di facebook. Por yama na telefon 724 4222 pa mas informashon.
FKBB na nòmber di su presidente, sra. Lisette Jansen i Tim di Transishon ta deseá e pueblo di Banda Bou i nan bishitantenan un Felis Marcha di Karnaval banda Bou 2020.
