Diktado papiamentu pika ku kontenido positivo na universidat Lus na horizonte

Diktado papiamentu pika ku kontenido positivo na universidat Lus na horizonte

 

E aña akí un biaha mas Fakultat General di Universidat di Kòrsou Dr. Moises da Costa Gomez a presentá e kompetensia: Diktado papiamentu. A selebrá e di tres lustro, komo ya ta 15 aña ta organisá e evento akí pa selebrá dia internashonal di idioma materno. E diktado ta un manera pa dediká atenshon na Papiamentu komo idioma materno di mayoria habitante di Kòrsou i e otro islanan abou.

 

Despues ku señora Muriel Meyer, komo maestro di seremonia, a habri e anochi di kompetensia, el a menshoná esnan na diferente manera involukrá den presentashon di e diktado, 15 aña largu. Entre nan a menshoná dekano di Fakultat General di Universidat di Kòrsou, Liesbeth Echteld, e miembronan di hurado, Ange Jessurun i Kathlyn Pruneti i presidente di hurado Ronnie Severing. Señora June Leonora ta atendé ku e parti di estadístika di resultado. A kuminsá ku un splikashon di e reglanan di skirbi ku ta konta pa e partisipantenan. Seguidamente a lesa e diktado ku e aña akí tabatin komo título Lus na horizonte. E tópiko ta relashoná ku nos situashon ku ta unu indeseabel: pèrèmpèmpèn. Ya a bira tempu pa nos suerte bòltu i porfin nos ta mira ku kos ta bayendo mihó. Asina por ripará ku ta renobá i konstruí hotèl, i asina ta habri  oportunidat pa kòki, weiter, bartènder, resepshonista, guia turístiko i tambe gerente pa manehá.

 

Tur e palabranan menshoná akí ta kontené vários reto di ortografia pa e partisipantenan entre otro di aksènt: mihó, akí, turístiko. Meskos ta konta pa signo diakrítiko: pèrèmpèmpèn, hotèl i kòki. Den e frase: ‘Esei pa regla lo pidié, no ta intenshon pa spant’é, ni pa kore kuné.’ Ta pa wak kua ta e partisipantenan ku ta bon pa skirbi kontrakshon korektamente: pidié, spant’é i kuné. Esnan ku ta inskribí, kasi anualmente, gusta pa mustra kiko nan sa i por, i sa tambe di eksperensia kua ta e desafionan ku nan mester prepará p’é. Bo ta ripará esei ora huntu e sala ta diskutí e trabou.

 

E mas ku 30 partisipantenan, ku tabata varia di edat entre 15 i 68 aña, a yega na un promedio di 15,5 eror. E mihó kandidato tabatin solamente 4 eror. Hurado a selektá e mihó kandidatonan ku e kantidat mínimo di eror. Den e ganadónan tabatin tres dama i un kabayero. Na e di tres lugá tabatin un empate entre Rutzen Lucas i Chantal Schotborg, ku tur dos tabatin 6 eror. E di dos premio a bai pa Stephenie Liket ku solamente 5 eror. E ganadó apsoluto di 2020 ta Andira Reenis ku 4 eror. Tabatin premio disponibel pa e tres ganadónan di parti di Fundashon pa Planifikashon di Idioma i di Sidney Joubert ku a regalá un sèt di dikshonario papiamentu. Tur kandidato a risibí un sertifikado di partisipashon. Sin duda, mayoria ta gosa di e parti di anochi kaminda konhuntamente ta trata e difikultatnan den e diktado. Ei por hasi pregunta i interkambiá di pensamentu riba e tópiko di ortografia di papiamentu. E reakshonnan ta indiká ku e partisipantenan a gosa di e enkuentro kompetitivo. Tur ta realisá ku e evento anual akí ta pa duna realse na papiamentu komo nos idioma di balor komun. 

 

Riba e portrèt di e grupo d.r.p.d.: Kathlyn Pruneti (miembro di hurado), Ange Jessurun (miembro di hurado), Ronnie Severing (presidente di hurado), Rutzen Lucas i Chantal Schotborg (di tres lugá), Stephenie Liket (di dos lugá), Andira Reenis (ganadó apsoluto di 2020), Muriel Meyer (lesadó di diktado i MC) i June Leonora (pa estadístika).