Entrada hudisial ku detenshon.

KOMUNIKADO DI PRENSA 091/ 2020
1 mart 2020
Entrada hudisial ku detenshon.
Departamentu di Komunikashon i Prevenshon
KUERPO POLISIAL KÒRSOU SIRBI I PROTEHÁ

Djasabra 29 di febrüari 2020, den oranan tempran di anochi, e personal di Divishon
di Krímen Organisá konhuntamente ku Tim di Aresto, Kustwacht, KMAR i Douane a
tene entrada hudisial den un kas na Rancho en konekshon ku violashon di lei di Opio
i lei di arma.
Na e kas ariba menshoná e tim a haña i konfiská un gran kantidat di blòkinan di
kokaina i mariwana i tambe un pistol ku bala skèrpi.
Den e kas tabata tin un dama di nashonalidat Venzolana ku ta kedando ilegal riba
nos isla. E dama aki L.C.C.R. di 22 aña di edat, nasé na Venezuela a keda detené pa
violashon di lei di Opio i arma.
Siguiendo ku e investigashon e Tim di Aresto a hasi detenshon di dos sospechoso ku
probablemente tambe ta responsabel pa e pistol i e droganan konfiská na e kas den
Rancho.
Ta trata aki di e dos hòmbernan:
 A.J.P.G., di 35 aña di edat, nasé na Venezuela;
 A.O.W.A., di 30 aña di edat, nasé na Kòrsou.
Nan detenshon a tuma lugá den area di Jongbloed. Durante di nan dentenshon polis
a haña i konfiská un arma di kandela i un montante di plaka.
Despues di nan detenshon e tim di investigashon a tene dos entrada hudisial na
adres di e sospechosonan, den bario di Jongbloed i Groot Kwartier.
Durante di investigashon na e adresnan Jongbloed i Groot Kwartier polis a haña i
konfiská artikulonan ku ta di importansia pa e investigashon.
A presentá e sospechosonan dilanti un Fiskal Ouksiliar ku despues di nan
interogashon a ordená nan enkarselamentu pendiente di mas investigashon.