Andrew Christopher unveiling

 

Willemstad- Ayera, djadumingu 1e di maart, Kòrsòu a konosé un artista nobo, mas bien, un artista nobo ku un estilo nobo.

Ku e asina yama “unveiling” di Andrew Christopher i e videoclip di su single nobo “Party with Casino”, un prome paso a wòrdu tumá den loke ta mustra di bai bira un karera prometedor.

 

E evento a kuminsá den kareda di 17:45 na Amazonia (antes L’Aldea), kaminda a tene un rueda di prensa, ku por sierto tabata bon bishitá.

E manager di Andrew Christopher, esta Kadir Snijder, kende tambe ta un konosido kantante, a hiba palabra i a splika ku e artista hoben aki ta un persona ku a lanta ku músika ta kore den su sanger i ku e ta un artista kompleto i ku potenshal internashonal.

 

E empresa ku tin e enkargo dje maneho i representashon di Andrew Christopher ta Silverwolves, kual empresa ta kere fielmente den su artista i ta sumamente enkantá ku e talento di e hoben aki, kual no ta limitá na kanto i baile só, pero tambe komo kantautor.

E manager a duna alabés di konosé ku t’esaki ta loke Silverwolves ta para p’é, esta buska, haña i instruí e yu di tera talentoso p’asina krea artistanan di renombre internashonal.

 

Despues di e rueda di Prensa, a pasa e videoclip, kual tabata di un nivel haltu i ku a kai den bon tera serka tur presente, hasta a ripití esaki.

 

Finalmente komo chèri rib’e bolo, despues di e videoclip e hòmber di momentu esta Andrew Christopher huntu ku su banda a duna un presentashon di kita sombré den kuá no solamente el a mustra su talento di kanto atrobe, pero huntu ku su dos kompañeronan a duna un koreografia sinkronisá i músika pa tene hende riba pia. Andrew den gran forma a sera e presentashon aki ku su single nobo “Party with Casino”.

 

E evento tabata un éksito total i tur presente a keda ku gana di mira mas di e artista Andrew Christopher.

Kòrsòu por ta orguyoso di e strea nobo aki na firmamentu i lo bai tende hopi mas di dje.